ماڭعىستاۋ وبلىسىندا ءفوتوتىلشى سەرىك مايەمەروۆتىڭ كورمەسى ءوتتى


گازەت بەتتەرىن پاراقتايتىن وقىرماندارعا ءفوتوتىلشى سەرىك مايەمەروۆتىڭ ەسىمى جاقسى تانىس. جۋرناليستيكا سالاسىنداعى جۇمىستى 2000 جىلى «قازاقستان- اقتاۋ» تەلەارناسىندا وپەراتور بولىپ باستاعان سەرىك 2006 -جىلدان بەرى وبلىستىق «ماڭعىستاۋ» گازەتىندە ءفوتوتىلشى قىزمەتىن اتقارىپ كەلەدى.
وڭىردە وتكەن ءىرىلى- ۇساقتى شارالاردان باستاپ، ماڭىزدى باسقوسۋ، جيىنداردىڭ باسى- قاسىنان تابىلاتىن سەرىك – ءوز ءىسىنىڭ ۇزدىگى، قاس- قاعىم ءساتتى قالت جىبەرمەيتىن قىراعى فوتوگراف. ونىڭ جەكە مۇراعاتىنان دالا مەن قالا، كارى مەن جاس، ءومىردىڭ كەز كەلگەن كورىنىستەرى، تابيعات تاماشالارى، تىرشىلىك تۇيتكىلدەرى، بارلىق سالا تىنىسى، ەڭبەك ۇجىمدارىنىڭ قالىپتاسۋ كەزەڭدەرى، جەكەلەگەن ادامداردىڭ سۋرەتتەرى مەن بەلگىلى تۇلعالاردىڭ وڭىرگە ساپارىنا قاتىستى سان ءتۇرلى سۋرەتتەردى تابا الاسىز. ءار سۋرەت تۇنىپ تۇرعان سىر دەسەك، سۋرەتتەر تۇتاسا كەلە وتكەن شاقتىڭ تاريحىن تولعاي جونەلەتىندەي.

سەرىك «سۋرەت كورمەسىن وتكىزسەم» دەگەن كوپتەن بەرگى ارمانىن بيىل تۇڭعىش پرەزيدەنت كۇنى جانە ەلىمىزدىڭ تاۋەلسىزدىك مەرەكەسى قارساڭىندا جۇزەگە اسىردى. «ەلباسى جانە رۋحى جاڭعىرعان ماڭعىستاۋ» تاقىرىبىنداعى كورمەگە اۆتوردىڭ 90-جىلدارداعى تىرناقالدى تۋىندىلارىنان باستاپ، كۇنى بۇگىنگە دەيىنگى ىرىكتەلگەن 100-دەن استام شىعارمالارى قويىلدى جانە سۋرەتتەردىڭ بارلىعى ەلباسىنىڭ ماڭعىستاۋ وڭىرىنە ءار جىلدارى جاساعان ساپارلارىنان سىر شەرتەدى.

– ماعان نۇرسۇلتان نازاربايەۆ ماڭعىستاۋعا كەلگەن ءار ساپارىندا سۋرەتكە ءتۇسىرۋ مۇمكىندىگى بۇيىردى. سونىمەن قاتار تەك ماڭعىستاۋدا ەمەس، 2015 -جىلعى استاناداعى يناۋگۋراتسيا ءساتىن جانە اسكەري نىساندارعا بارعان ساتتەرىن دە تۇسىرگەن ەدىم، وسى ادەمى كورىنىستەردى مەرەكە قارساڭىندا حالىقپەن ءبولىسۋدى ءجون سانادىم، – دەيدى سەرىك مايەمەروۆ.

2007 -جىلى وتكەن «كاسپي – دوستىق تەڭىزى» حالىقارالىق فەستيۆالىنىڭ جانە 2013 جىلى اقتاۋ قالاسىنىڭ 50 -جىلدىعىنا وراي وتكىزىلگەن فوتوكورمەنىڭ باس جۇلدەگەرى، 2014 -جىلى استانا قالاسىندا رەسپۋبليكالىق دەڭگەيدە ۇيىمداستىرىلعان «تابيعات – تال بەسىك» فوتوبايقاۋىنىڭ جەڭىمپازى، ماڭعىستاۋ وبلىسى اكىمىنىڭ «قۇرمەت گراموتاسىنا» ، بىرنەشە سالالىق باسقارمالاردىڭ ماراپاتتارىنا يە سەرىك – جۋرناليستەر وداعىنىڭ مۇشەسى، رەسپۋبليكالىق «فوتوونەر» قوعامدىق بىرلەستىگىنىڭ باتىس قازاقستان وبلىسى بويىنشا ءتوراعاسى.

بالا كەزىندە ەرتەرەك ومىردەن وتكەن اعاسى وسپاننىڭ قاسىنان ءبىر ەلى قالماي، اۋىلدىق جەردە قاراڭعى بولمەدە سۋرەت شىعارۋمەن ءوز قابىلەتىن ۇشتاعان سەرىك ونەردە وزىنە اقىل- كەڭەس بەرىپ، سۋرەتكە ءتۇسىرۋ الەمىنىڭ قىر- سىرىن ۇيرەتكەن ايساعالي قىدىر، بەيبىت نۇرسەيىت سىندى اعالارىنىڭ ەسىمدەرىن قۇرمەتپەن اتايدى.

س. مايەمەروۆتىڭ سۋرەت كورمەسىنە ماڭعىستاۋ وبلىسىنىڭ اكىمى ە. توعجانوۆ باستاعان اكىمدىك قىزمەتكەرلەرى، باسقارمالار باسشىلارى، سونداي- اق ونەر ادامدارى مەن ارىپتەستەرى، جاستار جينالدى. ولار ساپاسى مەن مازمۇنى ءبىرىن- ءبىرى تولىقتىرعان باي سۋرەت كورمەسىنە ريزاشىلىقتارىن ءبىلدىرىپ، اۆتور جۇمىسىنا ساتتىلىك تىلەدى.

گۇلايىم شىنتەمىر قىزى،
«ەگەمەن قازاقستان»

ماڭعىستاۋ وبلىسى