ديماش قۇدايبەرگەننىڭ ءان كەشى ءوتتى


16-جەلتوقساندا قىتايدىڭ چانشا قالاسىندا ديماش قۇدايبەرگەننىڭ جەكە كونسەرتى ءوتتى. ونىڭ ۆيدەوسىن «ديماشالي» شىعارماشىلىق ورتالىعىنىڭ باسشىسى قانات ايتبايەۆ جاريالادى.
«ون مىڭ ادامدىق زال لىق تولىپ، كورەرمەندەر كوتەرىڭكى كوڭىل-كۇيمەن كونسەرتكە ۇلكەن سەرپىن بەردى. بۇل كەشتە قازاق، حانزۋ، فرانسۋز، اعىلشىن تىلدەرىندەگى اندەر شىرقالدى. ديماشتىڭ ورىنداۋىنداعى شىعارمالاردى قىتاي، كانادا، امەريكا، رەسەي، ۋكراينالىق مۋزىكانتتاردان قۇرالعان وركەستر سۇيەمەلدەپ، بيشىلەر بيلەرىمەن ورنەكتەدى. كەش شىمىلدىعى قانات ايتبايەۆتىڭ سوزىنە جازىلعان ديماشتىڭ ءوزىنىڭ «سالەم» انىمەن اشىلىپ، ۇلىقپان جولداسوۆتىڭ اسقار دۇيسەنبىنىڭ سوزىنە جازىلعان «جۇلدىزىم» انىمەن جالعاستى» ، – دەپ جازدى قانات ايتبايەۆ ينستاگرام پاراقشاسىندا.
كەشتە، سونىمەن قاتار، ايگۇل باجانوۆانىڭ «ماحاببات بەر ماعان» ءانىنىڭ حانزۋ تىلىندەگى نۇسقاسى، ورال بايسەڭگىردىڭ سوزىنە جازىلعان ديماشتىڭ «ۇمىتىلماس كۇن» اندەرى ورىندالىپ، تىڭدارماندار بىرگە قوسىلىپ شىرقاعان.
بۇدان بولەك، بەيجىڭ قالاسىنان كەلگەن شىعارماشىلىق توپ زامانۋي ساحنالىق بەزەندىرۋدىڭ، رەجيسسەرلىك وڭتايلى شەشىمدەردىڭ شەبەرلىگىن كورسەتە بىلگەن.
«قىتاي ەلىندەگى قازاق فولكلورلىق تريوسى قىتاي حالىقتىق تريوسىمەن بىرلەسە شىعارما ورىنداپ كونتسەرتكە كورىك بەردى – دوستىق اۋەندەرىن توگىلتتى. ديماش ءوزىن رويالمەن سۇيەمەلدەي وتىرىپ ەستايدىڭ «قورلانىن» ورىندادى. ينتەرناتسيونالدىق وركەسترمەن بىرگە نۇرعيسانىڭ «القيسساسىن» ، قۇرمانعازىنىڭ «ادايىن» دومبىرامەن تارتتى. ديماشتىڭ جاقىندا جازىلعان «الەمدە سوعىس بولماسىن» اتتى ءتول تۋىندىسى قىتاي تىلىندە ورىندالىپ حالىقتى تەبىرەنتتى. كەش بويى كورەرمەندەردىڭ قوشەمەتى، ىقىلاسى ەرەكشە بولدى» ، – دەپ جازدى ءانشىنىڭ اكەسى.
كونسەرتتە كروسسوۆەر، ەتنو، كلاسسيكا، پوپ باعىتىنداعى جالپى سانى وتىز ءبىر شىعارما ورىندالىپ، كەش شىمىلدىعى سايات ابەنوۆتىڭ سوزىنە جازىلعان ديماشتىڭ ءوزىنىڭ «ءتاتتى ەلەس» انىمەنەن جابىلدى.