ديماشتىڭ شەتەلدەگى ەڭ العاشقى جەكە كونسەرتى قىتايدا وتەدى


ديماش قۇدايبەرگەننىڭ شەتەلدەگى شىعارماشىلىق كەشى حۋناننىڭ (Hu nan) چاڭشا (Changsha) قالاسىنان باستالادى.
بۇگىن ينستاگرامداعى پاراقشاسىندا ءوزىنىڭ الەمدىك تۋرنەسى وتەتىنىن حابارلاعان ديماش اسىل ارماندارىنىڭ ورىندالىپ جاتقانىن حاكىم ابايدىڭ ولەڭدەرى ارقىلى ورنەكتەدى. قازاق ءانشىسىنىڭ شەتەلدەگى تۇڭعىش شىعارماشىلىق كەشى جايلى ءبىلۋ ءۇشىن “ديماش- الي” شىعارماشىلىق ورتالىعىنىڭ جەتەكشىسى، ديماشتىڭ اكەسى قانات ايتبايەۆقا حابارلاسقان بولاتىنبىز.
«قىتايدىڭ اۋماعىندا وتەتىن ديماشتىڭ جەكە كونتسەرتى 16 -جەلتوقسان كۇنى چاڭشا قالاسىندا باستالادى. قاڭتار ايىندا تاعى ءبىر ۇلكەن قالالاردىڭ بىرىندە جالعاسادى. بۇل 27 ماۋسىمدا ەكسپو- نىڭ اياسىندا ءوزىمىزدىڭ تۋعان جەرىمىزدە، استانا قالاسىندا وتكەن كونتسەرتتىڭ جالعاسى ىسپەتتى» ، دەگەن ق. ايتبايەۆ كونتسەرتتىڭ ەرەكشەلىگى مەن ۇلىنىڭ شىعارماشىلىعىنداعى جاڭالىقتار تۋرالى ايتتى.
«ارينە، ءار ەلدىڭ تىلدىك ەرەكشەلىگىنە بايلانىستى كونتسەرتتىك باعدارلامالارعا وزگەرىستەر ەنگىزەمىز. ياعني، اعىلشىن، فرانسۋز تىلدەرىندەگى اندەردەن بولەك قاي ەلگە بارسا سول ەلدىڭ تىلىندەگى شىعارمالارعا كوبىرەك باسىمدىق بەرىلەدى. الايدا، ديماشتىڭ كەشى قاي مەملەكەتتە وتسە دە الەمدىك وركەنيەتكە قوسىلعان قازاقتىڭ اندەرى ەرەكشە دارىپتەلەتىنى ءسوزسىز. بۇل جاعىندا حالىقارالىق دەڭگەيدەگى كوپتەگەن كومپوزيتورلارمەن جۇمىس جاسالىپ جاتىر. ونىڭ بارلىعى ديماشتىڭ رەپەرتۋارىنا ەنگىزىلەتىن بولادى. سونىمەن قاتار، ءان جيناقتارى دا  دايىندالىپ جاتىر» ، دەدى ول.
قانات قۇدايبەرگەن ۇلىنىڭ ايتۋىنشا ديماشتىڭ شەتەلدە وتەتىن تۇڭعىش كونتسەرتىنىڭ بيلەتتەرى 20 قاراشادان باستاپ رەسمي تۇردە ساتىلا باستايدى. الدىن الا بيلەتكە تاپسىرىس بەرگەندەردىڭ قاراسى دا كوپ ەكەنىن ايتقان قانات ايتبايەۆ قىتايدان وزگە ەلدەردەن دە حابارلاسىپ جاتقان جانكۇيەرلەردىڭ از ەمەس ەكەنىن، قازاقستانداعى بىرنەشە فان كلۋبتەن دە قازاق بالاسىنىڭ الەمدىك ساحناداعى ونەر كەشىنە باراتىنى تۋرالى حابارلامالار كەلىپ تۇسكەنىن جەتكىزدى.
«ديماشتىڭ حالقىمىزدىڭ ونەرىن الەمدىك ساحناعا شىعارسام، الەم جۇرتشىلىعى دا قازاق مۋزىكاسىنان سۋسىنداسا دەگەن ماقساتتارى ورىندالىپ جاتىر. بالا كۇننەن بەرگەن سۇحباتتارىندا ايتىپ، شىعارمالارىندا جازعان ارماندارىنا ەڭبەكتىڭ ناتيجەسىندە جەتىپ جاتقانىنا ءبىز دە قۋانىشتىمىز. وعان بۇنداي ءىس- شارالار ۇلكەن سەرپىن بەرەدى. استانادا وتكەن كونتسەرتىنەن العان شابىت وسى ساحناعا شىعۋعا جەتەلەپ وتىر. سوندىقتان دا قىتايداعى ءان كەشى شەتەلدەگى ەڭ اۋقىمدى كونتسەرتتەردىڭ العاشقىسى بولىپ سانالادى. چاڭشا قالاسىنان كەيىنگى ساحنالاردى كورەرمەننىڭ سۇرانىسىنا قاراي وتىرىپ ناقتىلايتىن بولامىز» ، دەدى شىعارماشىلىق ورتالىقتىڭ جەتەكشىسى.
ال قىتاي سايتتارىنىڭ جازۋىنشا چاڭشاداعى 100 مىڭ كۆ مەتر اۋماقتاعى حالىقارالىق كورمە ورتالىعىندا وتەتىن ءان كەشىن 30 مىڭداي كورەرمەن تاماشالاي الادى ەكەن. ءبىر قىزىعى، ولار كونسەرتتىڭ قاي كۇنى وتەتىنى بەلگىلى بولماي تۇرىپ- اق وسى قالالارعا بيلەت الىپ، قوناق ۇيلەرگە تاپسىرىس تا بەرىپ قويىپتى. Weibo.com سايتىنىڭ حابارلاۋىنشا ديماشتىڭ قىتايداعى كەلەسى شىعارماشىلىق كەشى 2018 -جىلى 6 -قاڭتاردا ءوتۋى مۇمكىن.

مايگۇل سۇلتان،
«ەگەمەن قازاقستان»