دارحان ءقىدىرالى Forbes Kazakhstan باسىلىمىنا سۇحبات بەردى


“ەگەمەن قازاقستان” رگ” اق باسقارما ءتوراعاسى دارحان ءقىدىرالى Forbes Kazakhstan باسىلىمىنا باق تۋرالى زاڭداعى وزگەرىستەر، ءداستۇرلى باسىلىمدارداعى جارناما ءىسى، گازەت بولاشاعى، لاتىن ءالىپبيى تۋرالى سۇحبات بەردى.
باسىلىم ءتىلشىسىنىڭ “باق تۋرالى جاڭا زاڭنىڭ باپتارىنا قالاي قارايسىز؟ ” دەگەن سۇراعىنا دارحان قۋاندىق ۇلى بىرنەشە باپقا ەرەكشە توقتالىپ ءوتتى. “جاڭا زاڭدا مەملەكەتتىك ورگاندار جۋرناليستەردىڭ رەسمي ساۋالدارىنا 15 كۇننىڭ ىشىندە جاۋاپ بەرەدى دەلىنگەن. ارينە، گازەت باسشىسى رەتىندە مەن مەملەكەتتىك ورگانداردىڭ جۋرناليستەر ساۋالىنا جىلدام ءارى ساپالى جاۋاپ قايتارعانىنا مۇددەلىمىن. دەگەنمەن، 15 كۇننىڭ ىشىندە ساراپتامالىق، ستاتيستيكالىق جانە باسقا دا اقپاراتتاردى تولىق دايىنداۋعا جاقسى مۇمكىندىك تۋادى”، دەدى. ءوز سوزىندە “ەگەمەن قازاقستان” باسشىسى بۇرىن باسپا ءسوز قىزمەتىندە جۇمىس ىستەگەن تاجىريبەسىنە توقتالىپ ءوتتى. “گازەتكە دەيىن مەن باسپا ءسوز قىزمەتىندە جۇمىس ىستەگەنمىن. سول كەزدە وسىنداي ماسەلەلەرمەن ءجيى بەتپە- بەت كەلدىم. ءقازىر قۇقىقتىق ساۋاتتىلىق ارتتى. ياعني، جەكە ادامداردان كەلەتىن وتىنىشتەر كوبەيدى. بۇقارالىق اقپارات قۇرالدارىنىڭ سانى دا ارتىپ جاتىر. زاڭ بويىنشا “ەگەمەن” مەن كەشە عانا اشىلعان سايتتان تۇسكەن ساۋالدىڭ ستاتۋسى بىردەي. وسىنىڭ بارلىعىن ەسكەرىپ،  مەملەكەتتىك ورگانداعى باسپا ءسوز قىزمەتكەرلەرىنىڭ ءارقايسىسىنىڭ الدىندا كۇندەلىكتى قانشا حات كەلەتىنىن ەلەستەتىپ كورىڭىزدەر”، دەدى دارحان ءقىدىرالى.
سونىمەن قاتار ول جاڭا زاڭداعى باپتاردىڭ ءبىرى – جەكە ادامعا قاتىسى بار اقپاراتتى تاراتۋ ءۇشىن ونىڭ رۇقساتىن الۋ تۋرالى باپقا قاتىستى پىكىر ءبىلدىردى.
“اقپارات تاراتۋ – تەك قوعام نازارىن اۋدارۋ ەمەس، ءجۋرناليستىڭ ۇلكەن جاۋاپكەرشىلىگى ەكەنىن ەستەن شىعارماۋ كەرەكپىز. سوندىقتان جۋرناليستىك ەتيكا ماسەلەلەرىنىڭ كوتەرىلۋى ورىندى. فەيك جاڭالىقتار كوبەيىپ كەتكەندىكتەن، شىنايى ءارى تەكسەرىلگەن اقپارات تاراتۋ تالابىنا قاجەتتىلىك ارتتى. ياعني، اقپارات ادامنىڭ كونستيتۋتسيالىق قۇقىعىن شەكتەمەۋ كەرەك جانە ادام ومىرىنە كەرى اسەر ەتپەگەنى ءجون. كەيبىرەۋلەر بۇل باپتى ءسوز بوستاندىعىن شەكتەۋ دەپ قابىلداپتى. مۇنى جەكە ومىرىن كوپشىلىك نازارىنا ۇسىنعىسى كەلمەيتىن ادام قۇقىعىن قورعاۋ دەپ ءتۇسىنۋ كەرەك”، دەدى دارحان ءقىدىرالى.
سۇحبات بارىسىندا Forbes ءتىلشىسى دارحان قىدىرالىدەن “ەگەمەننىڭ” ورىس جانە اعىلشىن تىلدەرىندە اقپارات تاراتا باستاعان سايتى وقىرماندى گازەتتەن الىستاتپاي ما؟ ” دەگەن سۇراق قويدى. “تەلەارنا پايدا بولعاندا گازەتتىڭ شىعۋى توقتايدى دەگەن پىكىر بولدى. ەلەكتروندى كىتاپ شىققاندا، ەندى قاعاز كىتاپتار مەن گازەت- جۋرنالدار جوعالادى دەگەن وي ايتىلدى. ءبىراق، سوعان قاراماستان، كىتاپ پەن گازەت- جۋرنالدارعا دەگەن سۇرانىس تومەندەگەن ەمەس”، دەدى “ەگەمەن” باسشىسى.  سونىمەن قاتار ول سۇحبات سوڭىندا لاتىن الىپبيىنە قاتىستى پىكىر ءبىلدىردى. “لاتىن الىپبيىنە كوشۋ تۋرالى ەلباسىنىڭ شەشىمى تاريحي تاڭداۋ دەپ ايتساق تا بولادى. پرەزيدەنتتىڭ جارلىعى شىقتى، ەندى بۇل باعىتتا نەگىزگى جۇمىس باستالادى. اتقارىلاتىن جۇمىس كوپ، ونىڭ ىشىندە ورفوەپيالىق جانە ورفوگرافيالىق ەرەجەلەر دە جاسالادى”، دەي كەلە دارحان ءقىدىرالى جاڭا ءالىپبيدىڭ وقىرمان ىڭعايىنا لايىقتالىپ جاسالۋ كەرەكتىگىن ايتتى.