الماتىدا وزگە ۇلت وكىلدەرى اراسىندا «اباي وقۋلارى» ءوتتى


الماتىدا قالالىق اكىمدىك پەن تىلدەردى دامىتۋ باسقارماسىنىڭ ۇيىتقى بولۋىمەن وزگە ۇلت وكىلدەرى اراسىندا قالاارالىق اباي وقۋلارى ءوتتى. قالاداعى قازاق قاتىناس جولدارى ۋنيۆەرسيتەتىنىڭ ءماجىلىس زالىندا وتكەن بيىلعى بايقاۋدا 18-25 جاس ارالىعىنداعى جيىرما ءبىر ۇلتتىڭ وكىلى باق سىنادى.
مەملەكەت باسشىسىنىڭ «رۋحاني جاڭعىرۋ» باعدارلاماسىنىڭ اياسىندا ۇيىمداستىرىلعان بيىلعى بايقاۋ ءۇش كەزەڭ بويىنشا ءوتتى. «ولەڭ ءسوزدىڭ پاتشاسى» دەپ اتالعان العاشقى كەزەڭدە قاتىسۋشىلار ابايدىڭ ءبىلىم، عىلىم جانە ونەر تاقىرىپتارىنا ورىلگەن پوەزيالىق شىعارمالارىن نەمەسە قارا سوزدەرىن ناقىشىنا كەلتىرىپ جاتقا وقۋ ارقىلى سىنعا ءتۇستى. ال، «قازاقتا قارا ولەڭگە دەس بەرمەدىم» دەگەن اتپەن وتكەن ەكىنشى كەزەڭدە مۇحتار اۋەزوۆتىڭ ايگىلى «اباي جولى» رومانىنان ءۇزىندى وقىدى. «قۇلاقتان كىرىپ بويدى الار» كەزەڭىندە قاتىسۋشىلار اباي  اندەرىن  اۋەلەتە ورىنداپ، كوپشىلىكتىڭ ريزاشىلىعىنا بولەندى.
ۇيىمداستىرۋشىلار ۇمىتكەرلەردىڭ ونەرىن باعالاۋ كەزىندە ولاردىڭ كوركەم ءماتىندى تاڭداۋ تالعامىنا،   ولەڭ وقۋ شەبەرلىگىنە، قازاق ءتىلىنىڭ ورفوەپيالىق نورمالارىن ساقتاپ سويلەۋىنە، ءان ورىنداۋ ناقىشىنا، ساحنالىق ونەر كورسەتۋ مادەنيەتىنە جانە قازاقتىڭ ۇلتتىق كيىم ۇلگىسىنە باسا نازار اۋدارىلعانىن ايتتى.
حالىقارالىق اباي قورىنىڭ ديرەكتورى جۇمابەك اشۋ ۇلى، م. اۋەزوۆ اتىنداعى ونەر ينستيتۋتىنىڭ «اباي جانە جاڭا ءداۋىر ادەبيەتى» ءبولىمىنىڭ مەڭگەرۋشىسى قوراباي سەرىكقازى، «الماتى اقشامى» گازەتى رەداكتورىنىڭ ورىنباسارى اۋەلبەك انۋاربەك بايقاۋعا قازىلىق ەتتى.
بايقاۋ قورىتىندىسىنا سايكەس قازمقپۋ، فيلولوگيا فاكۋلتەتىنىڭ 2 كۋرس ستۋدەنتى تۋرسۋنوي ۋلۋگ قىزى جۇزدەن جۇيرىك دەپ تانىلىپ ءبىرىنشى ورىندى ەنشىلەدى. حالىقارالىق قازاق- قىتاي ءتىل كوللەدجىنىڭ شاكىرتى ليۋبوميلا مويسەەنكو ەكىنشى ورىن يەگەرى اتانسا، جۇلدەلى ءۇشىنشى ورىن قازمقپۋ ستۋدەنتى تاحمينا يۋسۋپجانوۆاعا بۇيىردى. جەڭىمپازدار مەن جۇلدەگەرلەر ارنايى ديپلومدار، سونداي- اق باعالى سىيلىقتارمەن ماراپاتتالدى.
– بايقاۋدىڭ باستى ماقساتى قازاق ءتىلىنىڭ قولدانىلۋىن دامىتۋ ارقىلى مەملەكەتتىك ءتىل ساياساتىن ناسيحاتتاۋ. اباي شىعارماشىلىعىن ناسيحاتتاۋ مەن قوعامدىق كەلىسىم مەن قازاقستاندىق رۋحاني بىرلىكتى نىعايتۋ جانە وتانسۇيگىشتىك سەزىمگە تاربيەلەۋ، كوپشىلىكتىڭ قازاقتىڭ ۇلتتىق مادەنيەتى مەن ونەرىنە، ادەبيەتى مەن تىلىنە دەگەن ىقىلاسىن ارتتىرۋ، جاستار اراسىندا كىتاپ وقۋ مادەنيەتىن دامىتۋ. بايقاۋعا  قاتىسقان وزگە ۇلت وكىلدەرىنىڭ   قازاق تىلىنە دەگەن قۇرمەتى مەن اباي شىعارماشىلىعىنا دەگەن سۇيىسپەنشىلىكتەرى كوڭىل قۋانتادى، – دەيدى تىلدەردى دامىتۋ باسقارماسىنىڭ ءبولىم باسشىسى باقىت قالىمبەت.

ارمان وكتيابر،
«ەگەمەن قازاقستان»
الماتى