«شابىت» حالىقارالىق شىعارماشىل جاستار فەستيۆالى اياقتالدى


بيىل جيىرماسىنشى رەت ۇيىمداستىرىلىپ وتىرعان بايقاۋعا ەلىمىزدىڭ بۇكىل وڭىرلەرىنەن جانە الىس- جاقىن بىرنەشە ەلدەن 500-دەن اسا ۇمىتكەر قاتىستى. دارىندى جاسقا قانات ءبىتىرىپ، ونەرىنىڭ ۇشتالا تۇسۋىنە مۇمكىندىك بەرەتىن بۇل بايقاۋدا بيىل جاستار ونەردىڭ التى ءتۇرلى سالاسى بويىنشا باسەكەگە ءتۇستى، ءبىر- ءبىرىنىڭ شاما- شارىقتارىن بايقاپ كوردى، جەتىستىكتەرى مەن كەمشىلىكتەرىنىڭ ارا جىگىن اجىراتتى، دۋالى اۋىز قازىلاردىڭ وي- پىكىرلەرىمەن ساناستى.
ءقايسىبىرى ەلوردانىڭ مادەني وشاقتارىندا تۇڭعىش رەت ۇلكەن ساحنادان ونەر كورسەتىپ، سونىڭ وزىنەن رۋحاني ءلاززات الدى. اسىرەسە، بار ونەرىن كورەرمەننىڭ الدىنا جايىپ سالىپ، ونىمەن تىكەلەي قارىم- قاتىناس ورناتاتىن، كورەرمەننىڭ رۋحاني الەمىنە وزگەشە ورنەك سالۋدى ماقسات ەتەتىن ء ان، سيرك، تەاتر الەمىنىڭ جاس ونەرپازدارى ۇلكەن ساحنانىڭ قىرى مەن سىرىنا، ءقادىر- قاسيەتىنە قانىقتى. قازىلار القاسىنىڭ قۇرامىنداعى تانىمال ونەر قايراتكەرلەرىنىڭ كەڭەسىن تىڭداپ، ولاردىڭ شەبەرلىكتەرىن تاماشالادى.
ماسەلەن، بيىل «كلاسسيكالىق مۋزىكا» اتالىمى بويىنشا قازىلار القاسىنىڭ قۇرامىنا شاقىرىلعان مۋزىكالىق اسپاپتاردىڭ شەبەر ورىنداۋشىلارى، رەسەي حالىق ءارتىسى، ن. جيگانوۆ اتىنداعى قازان مەملەكەتتىك كونسەرۆاتورياسىنىڭ رەكتورى رۋبين ابدۋللين مەن سانكت- پەتەربۋرگ كونسەرۆاتورياسىنىڭ پروفەسسورى الەكسەي ليۋديەۆيگ شەبەرلىك دارىستەرىن وتكىزدى. سونداي- اق ءدال وسى اتالىم بويىنشا قازىلار القاسىنىڭ مۇشەسى، يوردانيادان كەلگەن قوناق، كورول حۋسەين قورىنىڭ ۇلتتىق مۋزىكا كونسەرۆاتورياسىنىڭ ديرەكتورى مۇحاممەد سىدىك ەلوردالىق اكادەميالىق فيلارمونيامەن بىرگە بەتحوۆەننىڭ 5- كونسەرتىن ورىندادى.
شەبەرلىك دەمەكشى، «بەينەلەۋ ونەرى» اتالىمى بويىنشا «شابىتقا» كەلگەن جاس سۋرەتشىلەر ءوز ەلىمىزدىڭ اتى اڭىزعا اينالعان تۇلعالارىن شىن ومىردە كورىپ، ولاردىڭ شەبەرلىك سىنىپتارىنا قاتىستى. بەلگىلى ءمۇسىنشى توقتار ەرمەكوۆ جاس دارىنداردىڭ الدىندا قىزدىڭ ءمۇسىنىن جاساپ، ءمۇسىننىڭ ءاربىر دەتالىن جاساۋدىڭ قۇپياسىن ءتۇسىندىرىپ بەردى. بۇل اتالىم بويىنشا قولدانبالى ونەردىڭ مايتالماندارى قاتارىنداعى  قۇتتىبەك جاقىپوۆ، ءباتيما زاۋىربەكوۆا دا جاستارعا ونەردىڭ قىر- سىرىن ۇقتىردى.
جالپى ايتار بولساق، بيىل جيىرماسىنشى رەت وتكىزىلگەن بايقاۋدا جاس ونەر يەلەرىنە قويىلعان تالاپ  جوعارى دەڭگەيدە دەۋگە نەگىز بار. ويتكەنى بارلىق شىعارمالار مۇقيات ىرىكتەلىپ، سۇرىپتالىپ، لايىقتى ءبىر دەڭگەيگە جاۋاپ بەرەتىندەرى عانا ەكىنشى كەزەڭگە وتكىزىلگەن. بۇل تۋرالى «شابىت» باستالا قالعاندا مەملەكەتتىك سىيلىقتىڭ لاۋرەاتى، اقىن، «ۇزدىك ادەبي شىعارما» اتالىمى بويىنشا قازىلار القاسىنىڭ جەتەكشىسى نەسىپبەك ايت ۇلى، «بەينەلەۋ ونەرى» ، «كلاسسيكالىق مۋزىكا» اتالىمدارى بويىنشا قازىلار القاسىنىڭ جەتەكشىلەرى بەلگىلى ءمۇسىنشى توقتار ەرمەكوۆ پەن پروفەسسور رايسا مۇساقوجايەۆا دا ايتقان بولاتىن. سويتسە دە بايقاۋ بولعان سوڭ ونىڭ ءبىر نۇكتەسى، قورىتىندىسى بولادى دەسەك، كەشە ەلورداداعى «استانا» كونتسەرت زالىندا وتكەن گالا كونتسەرتتە جەڭىمپازداردىڭ، ياعني، ءار اتالىم بويىنشا گران- پري يەگەرلەرى مەن پرەزيدەنت كۋبوگى يەگەرىنىڭ اتى- ءجونى جاريالانىپ، ءتيىستى سىيلىقتارىنا قول جەتكىزدى.
سونىمەن «ۇزدىك ادەبي شىعارما» اتالىمى بويىنشا جاس جازۋشى قانات ءابىلقايىر، «بەينەلەۋ ونەرى» اتالىمىندا انەل ءالىباي، «اكتەرلىك شەبەرلىك» بويىنشا ۇلان قابىل، «سيرك ونەرىندە» «استانالىق  تسيركتىڭ» «ۆسترەچنىە كاچەلي» سيەۆەرنىە سيانيە» كومانداسى بايقاۋدىڭ گران- پري جۇلدەسىن يەلەندى. ال «حالىق مۋزىكاسى» اتالىمى بويىنشا «دومبىرا» ساناتىندا ۇلان باكىجانوۆ، «دومبىرامەن ءان ايتۋ» ساناتىندا مۇقيات اسقار، حالىق اسپاپتارى انسامبلدەرىنىڭ اراسىندا «قورقىت» ءانسامبلى، «كلاسسيكالىق مۋزىكا» اتالىمى بويىنشا «اكادەميالىق ءان ايتۋ» ساناتىندا ۇلپان ابدىكەرىموۆا، «الت، ۆيولونچەل، كونتراباس» ساناتىندا ەلدار ايتبەكوۆ جانە سكريپكاشىلار اراسىندا جىبەك مۇسىرعاليەۆا گران- پري جۇلدەسىن ەنشىلەدى. فەستيۆالدىڭ پرەزيدەنت كۋبوگى دە وسى جاس سكريپكاشى، بىرنەشە بايقاۋلاردىڭ لاۋرەاتى بولىپ ۇلگەرگەن جىبەك مۇسىرعاليەۆاعا بۇيىردى.

ايگۇل سەيىل،
سۋرەتتى تۇسىرگەن ەرلان ومار،
«ەگەمەن قازاقستان»