مەيرامبەك بەسپايەۆ قالي سارسەنبايدىڭ حاتىنا جاۋاپ بەردى


جۋىردا «ەگەمەن قازاقستان» گازەتىندە قازاقستاننىڭ ەڭبەك سىڭىرگەن قايراتكەرى، جازۋشى قالي سارسەنبايدىڭ مەيرامبەك بەسپايەۆقا ارنالعان «رۋعا ەمەس – رۋحقا، اعاعا ەمەس، الاشقا قىزمەت ەتەتىن كەزدەرىڭ» اتتى حاتى جارىق كورگەن بولاتىن. ءانشى مەيرامبەك بەسبايەۆ «حابار» ارناسىنىڭ «تىكەلەي ەفير» باعدارلاماسىنا قاتىسىپ، ونەر مەن مادەنيەت سالاسىنداعى بۇگىنگى قوعامدىق سانا مەن تانىم تۋرالى اڭگىمەلەي كەلە، ءسوز اراسىندا قالي سارسەنبايدىڭ حاتىنا دا جاۋاپ بەردى.
مەيرامبەك بەسبايەۆ جازۋشىنىڭ قازىرگى قازاق ونەرىنىڭ ءداستۇرلى رۋحاني قۇندىلىقتارمەن ساباقتاستىعىن جەتە زەردەلەۋگە قاتىستى قۇندى ويلارىنىڭ ورىندى ەكەنىن اتاپ ءوتتى.
«شىنىمدى ايتسام، سونداي ۇلكەن كىسىلەر بىزدەردى وقيدى دەپ ويلاماپپىن. ويىمىزدى قاداعالاعانى ءۇشىن العىس ايتامىن ءارى «قىزىم ساعان ايتامىن، كەلىنىم سەن تىڭدا» دەگەندەي ءبىراز نازىن ايتقان ەكەن. جالپى ماعان ەمەس، ءبىرتالاي ونەر ادامدارىنا كەرەكتى كوپ اڭگىمەلەر جازىپتى. جاستاردى قانشا سىناي بەرگەنمەن، ولاردىڭ ىشىندە دە اقىلدىلارى، ەستىلەرى بار. قۇداي قالاسا حاتقا كەڭىنەن جاۋاپ بەرۋگە تىرىسامىن. ءقازىر كونتسەرتكە دايىندىق ۇستىندەمىن. كونتسەرتتەن كەيىن اسىقپاي، مۇمكىن اعامىزبەن بىرگە وتىرىپ، وزىنە تىكەلەي جاۋاپ بەرەتىن شىعارمىن» ، دەدى ءانشى.
سونىمەن بىرگە، ول رۋحاني- ەستەتيكالىق تالعام مەن ۇلتتىق مەنتاليتەتىمىزدى ساقتاي وتىرىپ مادەنيەتتىڭ جاندانۋى ءۇشىن اتسالىسۋعا بيلىك باسىنداعى ونەرگە جانى جاقىن ادامدار قولعا الۋى ءتيىس ەكەندىگىن جەتكىزدى.
«بىرنەشە جىل بۇرىن تالاي- تالاي ءوزارا جينالىستار جاساعانبىز. ونىڭ ىشىندە كوپتەگەن ونەر ادامدارى بولدى. انشىلەر، اعا بۋىن وكىلدەرى. باسىندا كەلىسىپ الامىز دا، اياعىندا اياقسىز قالىپ كەتەدى. نەگە دەسەڭىز، بىزدە ءبارىبىر بيلىك بولماعاننان كەيىن جينالىپ الىپ، مىناۋ ءوتسىن، مىناۋ وتپەسىن دەپ ەش جەردە ايتا المايمىز. سوندىقتان ەفيرگە اركىم شىعۋعا قۇقىلى. سونىمەن بۇل ماسەلە سول كۇيى قالىپ قويعان ەدى. ەندى كەلەشەكتە شىنىمەن جانى اشيتىن بيلىك باسىنداعى، مادەنيەتتە، ونەرگە جاقىن ادامدار وسىنى قولعا الادى دەپ ويلايمىن» ، – دەدى مەيرامبەك بەسبايەۆ.