ماڭگىلىك ءتۇن


ءبىز ول كەزدە ستۋدەنت ەدىك.
اۋىل شارۋاشىلىعى ينستيتۋتىندا وقيتىن ءبىر دوسىمىزدىڭ تۋعان كۇنىنەن ءتۇن ورتاسىندا قايتىپ كەلە جاتتىق. كەنەت قازمۋ قالاشىعىنداعى مۇلگىگەن تىنىشتىقتى سەلت ەتكىزىپ، «تىق- تىق» ەتكەن توسىن دىبىس ەستىلدى. ءبىر ساتكە قۇلاق ءتۇرىپ، ىركىلىپ قالدىق.
بۇل نە؟ ..
سالدەن سوڭ بارىپ سانامىزعا جەتتى: تروتۋارعا تيگەن تەمىر تاياقتىڭ دىبىسى ەكەن. بىرتە- بىرتە بىزگە قاراي تاياپ كەلەدى. زاڭ فاكۋلتەتىندە وقيتىن ءبىر زاعيپ جىگىت بولۋشى ەدى. سول.. . ءدال تۇسىمىزعا كەلگەندە ءسال كىدىرىپ، بىزگە قاراي ءجۇزىن بۇردى. ءبىراق، بوگەلگەن جوق. قولىنداعى جەڭىل عانا اليۋميني تاياعىنىڭ ۇشىمەن تروتۋاردى تىقىلداتىپ ۇزاي بەردى.
ول الىستاپ كەتكەندە، ورتامىزداعى ءبىر جىگىت:
– ياپىر- اي، ءتۇن ىشىندە قالاي ءجۇر ەكەن؟ – دەدى تاڭعالىپ.
سول ۇرەي ءبىزدىڭ دە كوڭىلىمىزدە بولاتىن. ءبىراق زاعيپ جىگىت ەستىپ قالماسىن دەگەندەي، تاعى ءبىر دوسىمىز كۇبىرلەپ:
– ول ءۇشىن كۇنىڭ نە، ءتۇنىڭ نە.. . ءبارىبىر ەمەس پە، – دەدى.
تاۋ جاقتان ءبىر سالقىن ىزعار ەسكەندەي بويىمىز مۇزداپ كەتتى.

 

نۇرعالي وراز،
«ەگەمەن قازاقستان»