قاللەكي تەاترى جاس دراماتۋرگتەردى شاقىرادى


استانا قالاسى اكىمدىگىنىڭ باسپا ءسوز ورتالىعىندا وتكەن تەاتر ماۋسىمىنىڭ اشىلۋىنا وراي وتكەن شارادا ق. قۋانىشبايەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىنىڭ ديرەكتورى ايبولات سەكسەمبايەۆ الداعى ۋاقىتتا جاس دراماتۋرگتەرمەن، جاس رەجيسسەرلەرمەن جۇمىس ىستەمەك جوسپارلارى بار ەكەنىن جەتكىزدى.
«بۇگىنگى جيىن بارىسىن پايدالانا وتىرىپ، جاس دراماتۋرگتەرمەن جۇمىس ىستەۋ نيەتىمىز بار ەكەنىن ايتقىم كەلەدى. اسىرەسە،   كومەديا جانرىندا ىزدەنىپ جۇرگەن جاس دراماتۋرگتەر بولسا، شىعارمالارىمەن تانىسۋعا، تالقىلاۋعا نيەتتىمىز» ، – دەدى تەاتر باسشىسى. ول سونداي- اق، بۇگىنگى زاماننىڭ كەلبەتىن ءدال بەينەلەيتىن شىعارمالارعا دا تەاتر تاراپىنان سۇرانىستىڭ بار ەكەنىن ايتتى.

ايتا كەتەيىك، ق. قۋانىشبايەۆ اتىنداعى مەملەكەتتىك اكادەميالىق قازاق مۋزىكالىق دراما تەاترى جاڭا ماۋسىمىن 26-قازان كۇنى  م. اۋەزوۆتىڭ «اباي» تراگەدياسىمەن اشادى. سپەكتاكلدىڭ قويۋشى رەجيسسەرى – ق ر ەڭبەك سىڭىرگەن قايراتكەرى الىمبەك ورازبەكوۆ. «اباي» تراگەدياسىندا ابايدىڭ اعالىق جاستاعى ءرولىن قازاقستاننىڭ حالىق ءارتىسى تىلەكتەس مەيراموۆ سومداسا، جاس ابايدى ەڭبەك سىڭىرگەن قايراتكەر نۇركەن وتەۋىلوۆ وينايدى.

ايگۇل سەيىل،
«ەگەمەن قازاقستان»