ش ق و-دا ەڭ ۇزدىك اۋىل مەن ەڭ ۇزدىك اۋدان انىقتالدى

1508134386_article_s
ەلباسىنىڭ «رۋحاني جاڭعىرۋ» باعدارلاماسىن ىسكە اسىرۋ اياسىندا وڭىرىمىزدە 15 -شىلدە مەن 30 -قىركۇيەك ارالىعىندا «ۇزدىك شاعىن قالا» ، «ۇزدىك اۋدان» جانە «ۇزدىك اۋىل» اتالىمدارى بويىنشا وبلىستىق بايقاۋ ۇيىمداستىرىلدى.
بۇل ماقساتتا ايماقتا ارنايى كوشپەلى كوميسسيا قۇرىلىپتى. كوميسسيا مۇشەلەرى ۇزدىك اتاعىنا ۇمىتكەر 15 اۋىل مەن كەنتتەن، 2 شاعىن قالا جانە 15 اۋداننان ينفراقۇرىلىمى دامىعان، بارىنشا كوگالداندىرىلعان، اباتتاندىرىلعان ەلدى مەكەندەردى تاڭداپ الىپتى. «بايقاۋدىڭ باستاپقى كەزەڭىندە وتىنىمدەر جينالىپ، ۇمىتكەرلەردىڭ ءتىزىمى جاسالدى. بۇدان سوڭ 14 -تامىزدان 8 -قىركۇيەككە دەيىن كونكۋرستىق كوميسسيا مۇشەلەرى تاڭدالىپ الىنعان ەلدىمەكەندەردى ارالاپ، كوردى» ، – دەيدى وبلىستىق ەنەرگەتيكا جانە تۇرعىن ءۇي- كوممۋنالدىق شارۋاشىلىعى باسقارماسى باسشىسىنىڭ ورىنباسارى رينات بولاتقان.
ەلدىمەكەندەر عيماراتتاردىڭ، كوشە شامدارىنىڭ، اسفالت جابىندىسىنىڭ، قورشاۋلاردىڭ، ارحيتەكتۋرالىق فورمالاردىڭ، بالالار الاڭدارىنىڭ، تۇرمىستىق قالدىق الاڭشالارىنىڭ، جەكە ۇيلەردىڭ جاعدايى، جاسىل جەلەك سانى جانە تاعى باسقا دا ولشەمدەر بويىنشا باعالانىپتى. قۇرامىنا وبلىستىق باسقارمالاردىڭ، «نۇر وتان» پارتياسى فيليالىنىڭ وكىلدەرى جانە قوعامدىق كەڭەستىڭ مۇشەلەرى ەنگەن كوميسسياعا وبلىس اكىمىنىڭ ورىنباسارى سەرىك اقتانوۆ جەتەكشىلىك جاساپتى.
سونىمەن، «ۇزدىك شاعىن قالا» اتالىمىندا 1 ورىندى اياگوز، ەكىنشى ورىندى شەمونايحا شاھارى يەلەنسە، «ۇزدىك اۋدان» اتالىمىندا 1- ورىندى زايسان، 2 جانە 3 ورىنداردى تيىسىنشە ءۇرجار مەن كاتونقاراعاي اۋداندارى قانجىعالارىنا بايلاپتى. اياگوز اۋدانىنداعى شىڭعوجا اۋىلى «ۇزدىك اۋىل» دەپ تانىلسا، شەمونايحا اۋدانىنىڭ كامىشەنكا جانە تارباعاتاي اۋدانىنىڭ اقجار اۋىلدارى 2,3 ورىندارعا تابان تىرەگەن كورىنەدى. الداعى ۋاقىتتا بايقاۋ جەڭىمپازدارىنا اباتتاندىرۋ ماقساتىندا گرانتتار تابىستالاتىن بولادى.

ازامات قاسىم،
«ەگەمەن قازاقستان»
شىعىس قازاقستان وبلىسى