جاس اقىندار ءمۇشايراسى وتەدى

«رۋحاني جاڭعىرۋ – ۇلتتىڭ ۇلى مۇراتى» اتتى جاس اقىندار ءمۇشايراسى وتەدى

1508137593_article_s
استانا قالاسىنىڭ اكىمدىگى، استانا قالاسىنىڭ تىلدەردى دامىتۋ باسقارماسى 2017-جىلعى 17-قاراشادا «رۋحاني جاڭعىرۋ – ۇلتتىڭ ۇلى مۇراتى» جاس اقىندار ءمۇشايراسىن وتكىزەدى.
ءمۇشايرانىڭ ماقساتى:
ۇلتتىڭ ۇلى مۇراتى – تاۋەلسىزدىك پەن مەملەكەتتىلىكتىڭ، سونداي- اق رۋحاني قۇندىلىقتاردى جاڭعىرتۋدىڭ ماڭىزدىلىعىن كوپشىلىكتىڭ، جاس ۇرپاقتىڭ ساناسىنا ءسىڭىرۋ ارقىلى ولاردى وتانسۇيگىشتىككە، ەلجاندىلىققا باعىتتاۋ. تاۋەلسىز قازاقستاننىڭ ەلورداسى – استانانىڭ جارقىن جەتىستىكتەرىن پاش ەتۋ. شىعارماشىل جاستاردىڭ ونەرىنە قولداۋ كورسەتە وتىرىپ، مەملەكەتتىك ءتىلدىڭ قولدانىس اياسىن كەڭەيتۋ، ولەڭ قۇدىرەتى ارقىلى قازاق ءتىلىنىڭ مارتەبەسىن كوتەرۋ.

ءمۇشايرا ءۇش كەزەڭنەن تۇرادى:

ىرىكتەۋ كەزەڭى؛
داۋىس بەرۋ كەزەڭى؛
قورتىندى كەزەڭ.
ءمۇشايرا شارتتارى:

ءمۇشايراعا 14-29 جاس ارالىعىنداعى رەسپۋبليكا ايماقتارىنداعى اقىندار قاتىسا الادى؛
قاتىسۋشىلار ءوزى تۋرالى مالىمەت (اتى- ءجونى، وقۋ/قىزمەت ورنى،   بايلانىس نومىرلەرى) جولدايدى؛
ۇمىتكەرلەر تاۋەلسىزدىككە، استانا قالاسىنا ارناعان ءوز تۋىندىلارىن (ءار تاقىرىپقا ساي ءبىر ولەڭ) ۇسىنۋ كەرەك.
وتىنىشتەر (ولەڭدەر مەن ءوزى تۋرالى مالىمەتتەر) 3-قاراشاعا دەيىن قابىلدانادى. ىرىكتەۋدەن وتكەن ۇمىتكەرلەرگە 6-قاراشادا حابارلانادى جانە ولاردىڭ ولەڭدەرى ارنايى سايتقا سالىنىپ، 16-قاراشاعا دەيىن ينتەرنەت ارقىلى داۋىس بەرۋ كەزەڭى جۇرگىزىلەدى. قورىتىندى كەزەڭدە ۇمىتكەر اقىنداردىڭ ولەڭدەرى وقىلىپ، كورەرمەندەر اراسىندا دا داۋىس بەرۋ جۇرگىزىلەدى. جالپى الەۋمەتتىڭ، كەشكە قاتىسۋشى كورەرمەندەردىڭ جانە قازىلار القاسىنىڭ ساراپتامالىق باعاسىنىڭ ناتيجەسى بويىنشا جەڭىمپازدار مەن نوميناتسيا يەلەرى انىقتالادى. قورىتىندى كەزەڭ 17-قاراشادا وتەدى.

اقىنداردىڭ مىنا ەرەكشەلىكتەرىنە نازار اۋدارىلادى:

ءسوز قولدانىسىنا، ولەڭنىڭ مازمۇنى مەن تەرەڭدىگىنە؛
ولەڭ ۇيقاسىنا، كوركەمدىك ەرەكشەلىگىنە، تاقىرىپتى اشۋ سيپاتىنا؛
شىعارمالارىن وقۋ شەبەرلىگىنە (قورىتىندى كەزەڭدە) ؛
ءتىل تازالىعىنا، ساحنا مادەنيەتى جانە كيىمىنە (قورىتىندى كەزەڭدە) .
جەڭىمپازدار باعالى سىيلىق، ديپلوم جانە العىسحاتتارمەن ماراپاتتالادى.

مالىمەتتەر مەن ولەڭدەر (ەلەكتروندىق نۇسقادا) 3-قاراشادان كەشىكتىرىلمەي e.ensebaev@uya.astana.kz ەلەكتروندىق پوشتاسىنا جولدانۋ كەرەك.