باتىس قازاقستان تىلشىلەرى ءبىلىم جەتىلدىرەدى

باتىس قازاقستان وبلىسىنىڭ ەكى وبلىستىق, 12 اۋداندىق گازەتتەرىنىڭ باسىن قوسقان «جايىق پرەسس» مەدياحولدينگىندە جۋرناليستەردىڭ بىلىكتىلىگىن ارتتىرۋعا ارنالعان ەكى كۇندىك سەمينار ءوتتى. اۋداندىق گازەتتەردەن جينالعان جاس تىلشىلەرگە تانىمال جۋرناليستەر ءتۇرلى تاقىرىپتا ءدارىس وقىدى.

باتىس قازاقستان وڭىرلىك باسىلىمدارى بيىل ءبىر عاسىرلىق مەرەيتويىن اتاپ ءوتتى. قازاق جۋرناليستيكاسى ەرتە قالىپتاسقان ءوڭىر بولعانىمەن, ورالدا كاسىبي ماماندار تاپشى. ويتكەنى مامان ءتىلشى دايىندايتىن جوعارى وقۋ ورىندارى شالعاي, الماتى مەن استانا اسقان بىرەن-ساران جاس ەلگە ورالا بەرمەيدى. سوندىقتان «جايىق پرەسس» جشس باسشىسى جانتاس سافۋللين بيىل مەكەمە قىزمەتكەرلەرىنىڭ ءبىلىمىن جەتىلدىرۋگە, شەبەرلىگىن ۇشتاۋعا باسىمدىق بەرەتىنىن ايتقان ەدى. بۇگىنگى شارانىڭ ماقساتى – جەرگىلىكتى مەملەكەتتىك اقپارات قۇرالدارىندا قىزمەت ەتەتىن جاس جۋرناليستەردىڭ كاسىبي بىلىكتىلىگىن ارتتىرۋ, ۋاقىت تالابىنا ساي جەدەل اقپارات تاراتۋعا, زاماناۋي مەدياۇردىستى مەڭگەرۋگە, زاڭدى قۇقىقتارىن جەتىك بىلۋگە ماشىقتاندىرۋ بولدى.

سەميناردىڭ العاشقى كۇنى تانىمال جۋرناليست, قازاقستان رەسپۋبليكاسى اقپارات سالاسىنىڭ ۇزدىگى ەسەنجول قىستاۋباەۆ ءوز تاجىريبەسىمەن ءبولىستى. وقىرمان قاۋىم بيىل پايعامبار جاسىنا تولعان ەسەنجول جۇماعۇلۇلىن ساراپتاما ماقالالارى, جۋرناليستىك زەرتتەۋلەرى ارقىلى جاقسى بىلەدى. جاس تىلشىلەر وقىرماننىڭ رەداكتسياعا تۇسكەن ارىز-شاعىمدارىمەن جۇمىس ىستەۋ, كۇردەلى قۇقىقتىق تاقىرىپتاردى زەرتتەۋ جولدارىمەن تانىستى.

«ورال ءوڭىرى» گازەتىنىڭ ءبولىم رەداكتورى ساكەن ابىلحالىقوۆ سەمينارعا قاتىسۋشىلارعا ساراپتامالىق ماقالا جازۋداعى ەرەكشەلىكتەر, تۇيتكىلدەر جونىندە وي ءبولىستى. ساكەن مۇراتۇلى – 2015 جىلى قر ينۆەستيتسيالار جانە دامۋ مينيسترلىگى, «تەحنولوگيالىق دامۋ جونىندەگى ۇلتتىق اگەنتتىك» اق جانە قازاقستانداعى British Council-ءدىڭ باستاماسىمەن جاريالانعان ۇلتتىق يننوۆاتسيالار بايقاۋىندا گران-پري جۇلدەسىنە يە بولىپ, 1 ملن. تەڭگەدەن بولەك لوندون قالاسىندا كاسىبي تاعىلىمدامادان ءوتىپ كەلگەن بولاتىن.

«جايىق پرەسس» اقپارات ورتالىعىنىڭ جەتەكشىسى نۇرلىبەك راحمانوۆ مەدياماتىنمەن جۇمىس تاسىلدەرى تاقىرىبىندا ءدارىس وتكىزدى. بلوگەر رەتىندە, مەدياترەنەر رەتىندە كوپشىلىككە تانىلىپ قالعان نۇرلىبەك نۇرلانۇلى الەۋمەتتىك جەلىلەردەگى جاۋاپكەرشىلىك, قر زاڭنامالارىنداعى نورمالار تۋرالى توقتالدى.

ەكى كۇندىك سەمينار كەزىندە قاتىسۋشىلارعا ناقتى تاپسىرما بەرىلىپ, العان اقىل-كەڭەستى پراكتيكا جۇزىندە پايدالانىپ كوردى. سەمينار سوڭىندا مەدياحولدينگتىڭ باس ديرەكتورى جانتاس سافۋللين قاتىسۋشىلارعا سەرتيفيكات تابىستادى.

مۇنداي شارالار «جايىق پرەسستە» جىل سوڭىنا دەيىن ءجۇرىپ تۇرماق. ەندىگى كەزەكتە تەحنيكالىق ماماندار, گازەت قۇرۋشىلارى مەن ديزاينەرلەرگە ارنالعان سەمينار-ترەنينگتەر ۇيىمداستىرىلادى.

قازىبەك قۇتتىمۇراتۇلى,

«ەگەمەن قازاقستان»

ورال