4- قىركۇيەكتەن باستاپ قازاقستاندا كۇزگى جانە قىسقى اڭشىلىق ماۋسىمى باستالدى.

اتاپ ايتقاندا، سۇتقورەكتى اڭنىڭ 34 ءتۇرىن جانە قۇستىڭ 59 ءتۇرىن اۋلاۋعا رۇقسات ەتىلدى، دەپ حابارلايدى «قازاقپارات» ح ا ا ءتىلشىسى.

بۇل تۋرالى بۇگىن ق ر ا ش م ورمان شارۋاشىلىعى جانە جانۋارلار دۇنيەسى كوميتەتى ءتوراعاسىنىڭ ورىنباسارى قايرات ۇستەمىروۆ ءمالىم ەتتى.

«نەگىزى كۇزگى جانە قىسقى اڭشىلىق ماۋسىمى ەلىمىزدە 2017-جىلعى قىركۇيەك ايىنىڭ ءبىرىنشى سەنبىسىندە اشىلىپ، اڭدار مەن قۇستاردىڭ تۇرىنە بايلانىستى 2018-جىلدىڭ 15- اقپانىنا دەيىن سوزىلادى. قىركۇيەك ايىنان باستاپ مارالعا، ايۋعا، ءسىبىرتاۋ ەشكىسىنە، ەلىككە، قابانعا، شىلگە، قاراباۋىرعا جانە جابايى قۇستاردى اۋلاۋعا رۇقسات ەتىلەدى»، – دەدى قايرات ۇستەمىروۆ.

اڭ اۋلاۋ ءۇشىن ادامنىڭ جاسى 18 گە تولۋى كەرەك. سونىمەن بىرگە، ونىڭ ارنايى اڭشىلىق كۋالىگى مەن رۇسات ەتىلگەن قۇجاتى بولۋى شارت. شەتەلدىكتەر شەكارادان اڭشىلىق قارۋىن وتكىزۋ تۋرالى رۇقسات قاعازىمەن اڭشىلىق شارۋاشىلىقتارىمەن كەلىسە وتىرىپ، اڭ اۋلاي الادى.

ايۋعا جانە تۇياقتى جانۋارلاردى اۋلاۋ مىندەتتى تۇردە ينسپەكتورلاردىڭ قاراۋىمەن وتەدى.

«اڭشىلىق شارۋاشىلىق سۋبەكتىلەرى جانۋارلار دۇنيەسىنىڭ وبەكتىلەرىن اۋلاۋعا جانۋارلار دۇنيەسىن قولدانۋ تۋرالى رۇقساتىن العان ساتتەن باستاپ كۆوتا بويىنشا قۇقىلى. ال جەكە جانە زاڭدى تۇلعالار اڭشىلىق شارۋاشىلىقتارىنان جولداما العاننان كەيىن نەمەسە ولارمەن اڭ اۋلاۋعا كەلىسىمشارتقا وتىرعاننان كەيىن اڭ اۋلاي الادى»، – دەيدى قايرات ۇستەمىروۆ.