ءابدىراشتىڭ جاراسقانى . كەنجە بالا

«دۇنيەنىڭ باسى — توي،
اياعى — مۇڭ!» —
دەگەن ءسوزىن ۇقپاپپىن باياعىنىڭ.. .
ازاسىنان انامنىڭ قايتارىمدا،
كەلدى مەنىڭ قاسىما تاياپ ءىنىم.

اتى ايگىلى اۋلەتتىڭ «شىق بەرمەسى» ،
(قوناق جايلاپ،
حالىقتى كۇتكەن دە وسى)
اكەسىنىڭ — يىقتى شارۋاقورى،
شەشەسىنىڭ — سۇيىكتى ءسۇت كەنجەسى.

وسىنشالىق بىلسەمشى ويلى ەدى دەپ،
كەيدە شالقىپ جۇرەتىن،
كەيدە جۇدەپ.
شال سەكىلدى جەر شۇقىپ وتىردى دا:
وراعىتىپ الىستان سويلەدى كەپ:

— اكەڭ دە جوق،
شەشەڭ جوق ۇيىمىزدە،
قالامىز با قالىپتى كۇيىمىزدە؟ ..
بۇرىنعىداي ويىڭدى بولمەيسىڭ عوي،
كەلمەيسىڭ عوي سەن ەندى ءجيى بىزگە!

قارشادايدان قول ءۇزىپ كەتكەن ەدىڭ،
ەلگە وزىڭنەن ەرتەرەك جەتتى ولەڭىڭ.
تاڭىلدىم مەن بەينەتكەش بوساعاعا،
تانىتسىن دەپ الاڭسىز كوپكە ونەرىن.

كوڭىلىمدى كەمپىر- شال سەزەتىن- ءدى،
كەڭ دۇنيەنى قيالىم كەزەتىن- ءدى.
وشاعى ءۇشىن وسىناۋ شاڭىراقتىڭ
ءوز كەۋدەمدە ءسوندىردىم ءوز وتىمدى.

جولعا قارا،
دەگەن سوڭ جونگە قارا،
يە بولدىم وتىن- سۋ،
مال قوراعا.. .
كەنجە بالا — الاتىن ساۋاپتى دا،
جاۋاپتى دا بەرەتىن — كەنجە بالا.

بۇلدىرمەگەن تويىمسىز كوز كىمدەردى،
بارماسىمدى الىسقا سەزدىم دە ەندى.
قاپتاپ جۇرگەن وقىعان «فەودالدان»
قايتسەم- داعى وق بويى وزعىم كەلدى.

بولماشىعا قور بولعان بالعىن شاق- اي،
ءبىر شەتىنەن قالانىڭ سالدىم ساراي،
تالابىمنىڭ تارتىلىپ داريالارى،
ارال قۇساپ ارالدا قالدىم سولاي!

شىداتتى سالت،
بارىنە شىداتتى ادەپ.
جەتەر مە ەدىم ءالى دە مۇراتقا كوپ.
كوز جۇماردا كەمپىر- شال تاعى ءوتىندى:
«شاڭىراقتى قالاي دا قۇلاتپا!» — دەپ.

اقتىق ءسوزدى اتتاۋعا بار ما امالىم،
تىرشىلىكتىڭ تىزگىنىن قولعا الامىن.
تارايسىڭدار تۇگەلدەي شارتاراپقا،
تۋعان ۇيدە شوشايىپ مەن قالامىن.. .

«جوق نارسەنىڭ قىلاسىڭ نەسىن قايعى؟
ايتتىڭ، — دەمە، — قايداعى توسىن جايدى!»
الدا بۇلاي،
كەمپىر- شال بارداعىداي،
قوسىلمايدى- اۋ،
باسىمىز قوسىلمايدى.. .

كەڭەس بەرەر كەمەڭگەر بولماسام دا،
قاي بەتىممەن قارايمىن ەلگە سوندا؟
باسقا ەكەن عوي ورىنى قىز بالانىڭ،
بايعۇس اپام باس سۇعار اندا- ساندا.

اناۋ ۇلكەن اعانىڭ جايى بولەك،
ال سەن بولساڭ باق قۋىپ، بايىپ الەك.
تىم قۇرىسا جىلىنا ءبىر سوعىڭدار،
تۇرماعانمەن تىقاقتاپ ايىنا كەپ.. .

.. . ەرتەڭىنە —اپايىم،
مەن جانە اعا —
ءارقايسىمىز اتتاندىق ءار قالاعا.. .
قاقپا الدىندا قول بۇلعاپ قالا بەردى،
قالا بەردى كەمسەڭدەپ.. . كەنجە بالا.. .