اقمولالىق وقۋشى «تۋعان جەر» رەسپۋبليكالىق فوتوبايقاۋىندا توپ جاردى

اقمولا وبلىسى ساندىقتاۋ اۋدانىنىڭ پريوزەرنوە ورتا مەكتەبىندە وقيتىن 7-سىنىپ وقۋشىسى ارتەم ميحايلەۆ 11-17 جاس ارالىعىنداعى بالالار مەن جاستار اراسىندا وتكەن «تۋعان جەر» رەسپۋبليكالىق فوتوبايقاۋىندا توپ جاردى, دەپ حابارلايدى قازاقپارات ءتىلشىسى.

بايقاۋعا ەلىمىزدىڭ ءار وڭىرىنەن ۇسىنىلعان 600 استام شىعارماشىلىق جۇمىس قويىلدى. سكاۋت قوزعالىسىنىڭ ۇيىمداستىرۋىمەن وتكەن بايقاۋدا قاتىسۋشىلار قازاقستاندىقتاردى ءوزىنىڭ تۋعان ولكەسىمەن تانىستىرۋى كەرەك بولاتىن. وسى ورايدا ارتەم «مەنىڭ تۋعان ولكەم – پريوزەرنوە» تاقىرىبىمەن ءوزىنىڭ شىعارماشىلىق ەڭبەگىن ۇسىندى.

«ارتەم بايقاۋعا ادەيىلەپ دايىندالعان جوق. ول سۋرەتكە ءتۇسىرۋدى بالا كەزىنەن مەڭگەرگەن. سوندىقتان, بايقاۋعا جىبەرەتىن سۋرەتتەردى تاڭداۋدا قيىندىق بولعان جوق», – دەيدى اناسى تاتيانا ميحايلەۆا.

ال, ارتەمنىڭ ءوزى بايقاۋدا جەڭىمپاز اتانۋدى ويلاماعانىن ايتۋدا.

«مەن 600 ادام قاتىسقان بايقاۋدا توپ جارامىن دەپ مۇلدەم ويلاعان جوقپىن. دەگەنمەن, جاعىمدى جاڭالىقتى ەستىگەندە قۋانىشىم قوينىما سىيمادى. ماعان سۋرەتكە ءتۇسىرۋدى ۇيرەتكەن انام. سوندىقتان وعان العىسىم شەكسىز», – دەپ ءوزىنىڭ قۋانىشىمەن ءبولىستى ارتەم ميحايلەۆ.