كەنتاۋلىق 18 ادام جاستار كورپۋسىن دامىتۋ جوباسى اياسىندا 1 ملن تەڭگە گرانت ۇتىپ الدى

قازاقستاندا العاش رەت قولعا الىنعان «جاستار كورپۋسىن دامىتۋ» جوباسىنا كەنتاۋ قالاسىنان 18 جوبا ىرىكتەلىپ الىنىپ, 1 ملن. تەڭگە گرانت ۇتىپ الدى. جاس پروەكت جوباسىنىڭ ا جانە س توبىنا وتكەن جاستار 9 بولسا,  ۆ توبىنا وتكەن جاستار 9 ازاماتتى قۇرادى.

ا توبىنىڭ قاتىسۋشىلارىنا ومىرلىك ماڭىزى بار داعدىلاردى دامىتۋ جانە جوبالاردى باسقارۋ باعدارلاماسىنا قاتىسۋ, سونداي-اق ءوزىنىڭ كىشى جوباسىن گرانت ەسەبىنەن ىسكە اسىرۋ, مەنتوردىڭ قولداۋىن الۋ مۇمكىندىگى بەرىلەدى. ال, ۆ توبىنىڭ قاتىسۋشىلارى گرانت ەسەبىنەن ءوزىنىڭ جەكە  جوباسىن ىسكە اسىرۋ مۇمكىندىگىن السا, س توبىنىڭ قاتىسۋشىلارى ومىرلىك ماڭىزى بار داعدىلاردى دامىتۋ جانە جوبالاردى باسقارۋ باعدارلاماسىنا قاتىسۋ, مەنتوردىڭ قولداۋىن الۋ مۇمكىندىگىنە يە بولادى.

كەنتاۋ قالاسىنان گرانت يەلەنگەن جوبالاردىڭ باسىم كوپشىلىگى مەديتسينالىق ماسساج جانە ترەناجەر زالى, قۇس فەرماسى, كونديتەرلىك, مال شارۋاشىلىعى, اعىلشىن ءتىلى كلۋبى, شاشتاراز, تىگىن شەبەرحاناسى, ۇلتتىق ناقىشتاعى سومكە تىگۋ مەن براين كىتابى سىندى جوبالار بولىپ كەلەدى.

جوبالار بويىنشا قاتىسۋشىلار 5 اي كولەمىندە شاكىرتاقىمەن جانە قايتارىمسىز گرانتپەن قامتاماسىز ەتىلەدى.

جاستارعا مول مۇمكىندىك بەرەتىن بۇل جوبانى قر ءبىلىم جانە عىلىم مينيسترلىگى مەن حالىقارالىق قايتا قۇرۋ جانە دامۋ بانكى بىرلەسە جۇزەگە اسىرۋدا. ماقساتى – جاستاردى الەۋمەتتەندىرۋ, اسىرەسە از قامتىلعان حالىق توبىن قوعامدىق پايدالى ىستەرگە جۇمىلدىرا وتىرىپ, ىنتالاندىرۋ.

اتالعان جوبا قازاقستاننىڭ 4 وڭىرىندە, ياعني, وڭتۇستىك قازاقستان, الماتى, پاۆلودار جانە قاراعاندى وبلىستارىنىڭ اۋماقتارىندا ەكى جىلدىق پيلوتتىق جوبا اياسىندا جۇرگىزىلەتىن بولادى.