شىمكەنتتىڭ ويىنشىقتارى شەتەل نارىعىندا ساۋدالانباق

شىمكەنت قالاسىنداعى «ناۋرىز پلاستيك» ساۋدا بەلگىسىنىڭ ونىمدەرى ەندى شەتەل نارىعىندا ساۋدالانباق.

جەرگىلىكتى نارىقتا بىرنەشە جىل بۇرىن پايدا بولعان بۇل كاسىپورىن ونىمدەرى سوڭعى ۋاقىتتا كەڭ سۇرانىسقا يە بولعان. بۇگىندە زاۋىت ويىنشىق كولىكتىڭ 10 ءتۇرى مەن قۇراستىرعىشتىڭ 5 ءتۇرىن شىعارادى. ءونىمنىڭ ءار بولشەگى جەكە-جەكە دايىندالىپ, سوڭىنان قۇراستىرۋعا جىبەرىلەدى.

«قازاقستاندا جاسالعان» تاۋار بەلگىسى بار ويىنشىقتار شىمكەنت قالاسىنىڭ بازارلارى مەن وبلىسىمىزدىڭ بارلىق اۋداندارىندا ساتىلۋدا. وندىرۋشىلەردىڭ ايتۋىنشا, باعاسى قىتايلىق ويىنشىقتاردان ەكى ەسە ارزان. كاسىپكەرلەر بۇل ويىنشىقتار بارلىق حالىقارالىق ەكولوگيالىق تالاپتارعا ساي كەلەدى دەيدى. پلاستماسساسى – ساپالى, ۋلى ەمەس. سوندىقتان, ويىنشىقتار بالا دەنساۋلىعى ءۇشىن قاۋىپتى ەمەس دەپ سەندىرەدى وندىرۋشىلەر.

كاسىپكەرلەر ەكى وندىرىستىك جۇيەنى ساتىپ الۋعا قارجىنى «بيزنەستىڭ جول كارتاسى – 2020» باعدارلاماسى اياسىندا العان. كاسىپورىننىڭ ءوندىرىس قۋاتى ايىنا ءۇش مىڭ ونىمنەن اسادى. دەگەنمەن, ءوندىرىس كولەمىن 10 مىڭ داناعا دەيىن كوبەيتۋ مۇمكىندىگى بار.

قازىرگى تاڭدا كاسىپورىن ءوندىرىسى تولىعىمەن جولعا قويىلعان. جاقىندا كاسىپكەرلەر يندۋستريالدى ايماقتاعى جاڭا عيماراتقا كوشتى. ەندى ءوندىرىس قۋاتىن ارتتىرىپ, تاياۋ جانە الىس شەتەل نارىعىنا شىعۋدى جوسپارلاپ وتىر.