قاراعاندىدا ەسكى كولىكتەردى قايتا وڭدەيتىن زاۋىت ىسكە قوسىلدى

بۇگىن قاراعاندىداعى «سارىارقا» ارنايى ەكونوميكالىق ايماعىندا ىستەن شىققان ەسكى اۆتوكولىكتەردى قايتا وڭدەيتىن «RecyclingCompany» جشس زاۋىتى قۇرىلىسىنىڭ ءبىرىنشى كەزەڭى ىسكە قوسىلدى. ەندىگى ۋاقىتتا ەلىمىزدىڭ كەز كەلگەن ازاماتى ىسكە جارامسىز تەمىر تۇلپارلارىن ەسكى كولىكتەردى قابىلدايتىن ارنايى ورىندارعا تاپسىرىپ, اقىسىن الا الماق.

جالپى, وتكەن جىلى ەسكى كولىكتەردى وڭدەۋ بويىنشا مەملەكەتتىك باعدارلاما قابىلدانىپ, وسىنىڭ اياسىندا توزعان كولىكتەر مەن ولاردىڭ قوسالقى بولشەكتەرىن جيناقتاۋ ىسكە اسىرىلىپ كەلە جاتقان بولاتىن. بۇگىندە ەلىمىزدە كولىك قالدىقتارىن جينايتىن 17 پۋنكت اشىلعان. جيناقتالعان وسى كولىكتەر ەندى قاراعاندىعا جەتكىزىلىپ, وڭدەۋدەن وتەتىن بولادى.

قاراعاندىنىڭ «سارىارقا» ارنايى ەكونوميكالىق ايماعىندا سالىنعان زاۋىتتىڭ ازىرگە ءبىرىنشى كەزەڭى ىسكە قوسىلدى. جالپى قۇنى 3 ميلليارد 400 ميلليون تەڭگەنى قامتيتىن زاۋىت قۇرىلىسىن تولىق اياقتاۋ ۇستىمىزدەگى جىلدىڭ جەلتوقسان ايىنا جوسپارلانعان. نەگىزىنەن بۇل جوبا 2015-2019 جىلدارعا ارنالعان يندۋستريالدى-يننوۆاتسيالىق دامۋ مەملەكەتتىك باعدارلاماسى اياسىندا جۇزەگە اسىپ وتىر. سالتاناتتى شاراعا قاراعاندى وبلىسىنىڭ اكىمى ەرلان قوشانوۆ, قر ينۆەستيتسيا جانە دامۋ ءبىرىنشى ۆيتسە-ءمينيسترى اليك ايدارباەۆ, قر ەنەرگەتيكا ۆيتسە-ءمينيسترى عاني سادىبەكوۆ جانە وتاندىق اۆتووندىرۋشىلەر مەن ەكولوگيالىق ۇيىم وكىلدەرى قاتىستى. ا.ايدارباەۆ ءوز سوزىندە جوبانىڭ ماڭىزدىلىعىنا توقتالىپ, ەڭبەك ونىمدىلىگىن ارتتىرۋ مەن وڭدەلگەن تاۋار ەكسپورتىنىڭ كولەمىن ۇلعايتۋعا باعىتتالعان وڭدەۋ ونەركاسىبىنىڭ باسەكەگە قابىلەتىلىگىن ىنتالاندىرۋعا باسا نازار اۋدارۋ كەرەكتىگىن ەسكە سالدى. ونىڭ ايتۋىنشا, مۇنداي جوبالار مەملەكەت تاراپىنان تولىق قولداۋعا يە. ماسەلەن, ناقتى جوبالاردىڭ ينفراقۇرىلىمى, ۇزاق مەرزىمدى ليزينگ پەن نەسيەلەۋ, جوبالاۋ كومپانيالارىنىڭ جارعىلىق كاپيتالىنا كىرۋ سىندى  نەبىر تۇرلەرى مەن تاسىلدەرى ۇسىنىلادى.

بۇگىنگى تاڭدا ءوز جۇمىسىن باستاعان اتالمىش زاۋىتتىڭ ازىرگە ورتالىق ازيادا تەڭدەسى جوق. سونداي-اق, قازاقستاننىڭ قايتا وڭدەۋ سالاسىنداعى ءىرى جوبالاردىڭ ءبىرى بولىپ سانالادى. زاۋىتتىڭ ديرەكتورى الەكاندر ريابين مىرزانىڭ ايتۋىنشا, جوبانىڭ ەكىنشى كەزەڭى اياسىندا پيرروليزدەۋ قۇرىلعىلارىن ورناتىپ, وڭدەۋ مۇمكىندىگى 98 پايىزعا جەتكىزىلمەك. ەسكى اۆتوكولىكتەردى قايتا وڭدەيتىن زاۋىت قازىرگى ۋاقىتتا جەتپىستەن استام ادامدى جۇمىسپەن قامتىپ وتىر. جوبانى ىسكە اسىرۋعا جەرگىلىكتى بيلىك تە جان-جاقتى قولداۋ بىلدىرۋدە. ايماق باسشىسى ەرلان قوشانوۆ ايتىپ وتكەندەي, ەلىمىزدە  بۇگىنگى تاڭدا 5 ميلليوننان ارتىق كولىك بولاتىن بولسا, سونىڭ ۇشتەن ءبىرى جارامسىز بولىپ تابىلادى. – ال, ولاردىڭ قورشاعان ورتاعا تيگىزەتىن زياندى اسەرى بۇعان دەيىن كەزەك كۇتتىرمەس ماسەلە بولاتىن. سول تۇرعىدان ونىڭ شەشۋ جولىنىڭ ءبىرى بۇگىنگى ءبىز اشىپ وتىرعان زاۋىت دەپ ەسەپتەيمىز. ءوندىرىستىڭ «سارىارقا» ارنايى ەكونوميكالىق ايماعىندا قۇرىلعاندىعى دا ءبىزدى قاتتى قۋانتادى. بۇل جوبا حالىقتىڭ دەنساۋلىعىن ساقتاۋعا جانە قورشاعان ورتانى قورعاۋعا, قالدىقتاردىڭ كەرى اسەر ەتۋىن قىسقارتۋ مەن الدىن الۋعا باعىتتالعان, – دەدى اكىم.

جاڭا زاۋىت يندۋستريا 4.0 جانە تسيفرلاندىرۋ تالاپتارىنا جاۋاپ بەرەتىن زاماناۋي يتاليالىق قوندىرعىلارمەن جابدىقتالعان. كەشەننىڭ بارلىق جۇمىسىن كومپيۋتەرلىك جۇيە باقىلايدى.

يتاليانىڭ «Bonfiglioli» ءوندىرۋشىسى شىعارعان شرەدەرلىك بۇل قۇرىلعىلاردىڭ قۋاتى جىلىنا 50 مىڭ ەسكى كولىكتى جويۋعا جەتەدى. ساعاتىنا 20 اۆتوكولىكتى مەتالعا اينالدىرىپ, قايتا وڭدەي الادى. ال, ەكىنشى كەزەڭ بويىنشا قالدىقتان الىنعان ءتۇستى جانە قارا مەتالل قورىتپاسى ايماقتاعى مىس قورىتۋ كاسىپورنىنا جەتكىزىلمەك. وسىلايشا, ەكونوميكانىڭ ءوزارا بايلانىستى سالالارى اراسىندا مۋلتيپليكاتيۆتى ىقپال ارتا تۇسەدى دەگەن سەنىم بار.

ءدال وسىنداي زاماناۋي قۇرىلعىنى بۇگىنگى تاڭدا اقش, يتاليا جانە ەۋروپانىڭ باسقا دا ەلدەرىندە كەڭىنەن قولدانادى ەكەن.

سالتاناتتى شارا بارىسىندا سونداي-اق, ەسكى كولىكتەردى جويۋعا وتكىزىپ, جاڭا كولىك ساتىپ الۋعا جەڭىلدىكتەر بەرەتىن سەرتيفيكاتتار جايلى ايتىلدى. قر ەنەرگەتيكا مينيسترلىگى قاراستىرعان ءتيىستى كۆوتا بويىنشا, ەسكى جەڭىل اۆتوكولىك ءۇشىن وكم وپەراتورلارى 315 مىڭ تەڭگەلىك سەرتيفيكات ۇسىنادى. بۇگىنگە دەيىن ەسكى كولىكتەردى جويۋعا وتكىزىپ, جاڭا كولىك ساتىپ الۋعا سەرتيفيكات بەرەتىن باعدارلاما بويىنشا 28284 اۆتوكولىك قابىلدانعان. توزعان تۇلپاردى ءتيىستى ورىنعا تاپسىرۋدا ازىرگە قوستاناي قالاسى الدا تۇرعان كورىنەدى. باعدارلاما تالابى بويىنشا كەز كەلگەن ازامات ەكى سەرتيفيكاتتى بىرىكتىرىپ, تاڭداعان ساناتىنداعى كولىك قۇرالىن ساتىپ الۋعا بولادى.

ميراس اسان,
«ەگەمەن قازاقستان»

قاراعاندى وبلىسى