ەلوردا جاياۋ جۇرگىنشىلەرى جول ەرەجەسىن 6000 رەت بۇزعان

ءار بەسىنشى جول-كولىك اپاتى جاياۋ جۇرگىنشىلەردىڭ ەرەجە بۇزۋىنان ورىن الىپ وتىر. 

جىل باسىنان ەلوردالىق پوليتسەيلەر جاياۋ جۇرگىنشىلەردىڭ جول قوزعالىس ەرەجەسىنىڭ 6000-نان استام بۇزۋشىلىعىن تىركەدى, سالىنعان ايىپپۇل سوماسى 50 476 906 تەڭگە.

پوليتسەيلەردىڭ سوزىنە قاراعاندا, قابىلدانىپ جاتقان شارالار مەن اكىمشىلىك جاۋاپكەرشىلىككە قاراماستان, جاياۋ جۇرگىنشىلەر جول قوزعالىس ەرەجەسىنە ءالى دە سالعىرت قاراۋدا. جكا الدىن الۋ ءۇشىن ەلوردالىق جول پوليتسيا قىزمەتى 4-5 تامىز ارالىعىندا «جاياۋ جۇرگىنشى» اكتسياسىن وتكىزەدى. اپاتتى-قاۋىپتى جول ۋچاسكەلەرىندە جول-پاترۋل قىزمەتىنىڭ جۇمىسى كۇشەيتىلەدى.

– جاياۋ جۇرگىنشىلەر وتپەجولدارمەن, ول بولماعان جاعدايدا جولدىڭ جيەگىمەن ءجۇرۋى ءتيىس. جاياۋ جۇرگىنشىلەر جولدى ارنايى جاياۋ جۇرگىنشىلەر وتپەجولى (ونىڭ ىشىندە جەراستى) ارقىلى قيىپ ءوتۋى قاجەت. ياعني بەلگىلەنبەگەن جەردە جولدى قيىپ وتۋگە بولمايدى, – دەدى ءتارتىپ ساقشىسى.