استانادا رۇقساتسىز ورىنداردا ساۋدا جاساۋمەن كۇرەس كۇشەيتىلدى

استانا قالاسى ءىىد جەرگىلىكتى پوليتسيا قىزمەتى باق وكىلدەرىمەن بىرگە بىگىلەنبەگەن جەرلەردە جۇرگىزىلەتىن ساۋدانى انىقتاۋ بويىنشا رەيد جۇرگىزدى, دەپ حابارلايدى قالا اكىمدىگىنىڭ مەديا ورتالىعى.

جىل باسىنان بەرى استانادا بەلگىلەنبەگەن ورىنداردا ساۋدامەن اينالىسۋ بويىنشا 1600 اكىمشىلىك قۇقىق بۇزۋشىلىق انىقتالعان. جالپى سوماسى 1 508 885 تەڭگەگە ايىپپۇل سالىندى.

اكىمشىلىك كودەكستىڭ «بەلگىلەنبەگەن ورىنداردا ساۋدا جاساۋ» 204 بابىنا ساي ەسكەرتۋ نەمەسە 5 اەك (11 345 تەڭگە) ايىپپۇل قاراستىرىلعان. ءبىر جىل ىشىندە قايتا زاڭ بۇزسا, 10 اەك (22 690 تەڭگە) ايىپپۇل سالىنادى. ەگەر قۇقىق بۇزۋشىلىق جۇيەلى تۇردە قايتالانسا, زاڭسىز ساۋدا جۇرگىزگەن كاسىپكەردىڭ پاۆيليونى تاركىلەنەدى. جىل باسىنان بەرى 60 ساۋدا ورنى الىنىپ تاستالعان, ال جىل سوڭىنا دەيىن تاعى 100 نۇكتە جويىلماق.

ءوز كەزەگىندە ەلوردالىق كاسىپكەرلەرگە دالا ساۋداسى ءۇشىن 1000 ورىن بولىنگەن. بۇل باعدارلامانىڭ وپەراتورى «استانا الەۋمەتتىك – كاسىپكەرلىك كورپوراتسياسى ۇلتتىق كومپانيا» اق بورلىپ تابىلادى. ورىنداردى انىقتاۋ ءۇشىن قۇرامىنا مەملەكەتتىك ورگان وكىلدەرى, اتاپ ايتساق, كاسىپكەرلەر پالاتاسى جانە وزگە دە قۇزىرلى مەكەمەلەردەن كىرگەن ارنايى كوميسسيا قۇرىلدى.

بۇدان بولەك, ارنايى ماقساتتا پايدالانۋعا ارنالعان ورىندار ءتىزىمى, نىساننىڭ سىرتقى كەلبەتىنە قويىلاتىن تالاپ, ستاتسيونارلىق نىسان نەمەسە ءموبيلدى قوندىرعى ەكەنى انىقتالىپ, كەلىسىلدى.

«كوشە ساۋداسىنا ارنالعان 1000 ورىن» باعدارلاماسىنا سايكەس ساۋدا-ساتتىق جۇرگىزۋگە رۇقسات العان كاسىپكەرلەر ساۋداسىن زاڭسىز جۇزەگە اسىراتىنداردان سارى ءتۇستى ارنايى فورمامەن ەرەكشەلەنەدى. ونىمەن بىرگە كاسىپكەردە كەلەسى قۇجاتتار بولۋى كەرەك: «استانا الەۋمەتتىك-كاسىپكەرلىك كورپوراتسياسى» ۇك» اق-مەن جاسالعان كەلىسىمشارت نەمەسە سۋبجالعا الۋ كەلىسىمشارتى. جازعى ۋاقىتتا ازىق-تۇلىك ونىمدەرى مەن زاتتاردىڭ كەلەسى ءتۇرى سۇرانىسقا يە: بالمۇزداق, ءتاتتى سۋسىندار, كوكونىس-جەمىستەر, كۇننەن قورعايتىن كوزىلدىرىك جانە ت.ب. زاتتار. قالا تۇرعىندارى مەن قوناقتارى زاڭسىز ساۋدا-ساتتىق جاعدايىنا تاپ بولعان جاعدايدا 109 نومىرىنە حابارلاسۋلارىنا بولادى.

«ازاماتتار ءتيىستى رۇقسات قۇجاتتارىنسىز وزدەرى دۇڭگەشىكتەردى قويىپ الادى. قولدانىستاعى جانە قولدا بار اكىمشىلىك رەسۋرستار ايتارلىقتاي ناتيجە بەرمەيدى, سول سەبەپتەن ازامات ايىپپۇلدى تولەيدى نەمەسە وعان ەسكەرتۋ جاسالادى. سوندىقتان دا ءبىز زاڭسىز ساۋداعا توسقاۋىل قويۋ ماقساتىندا بۇزۋشىلىقتار ورىن العان جاعدايدا, زاڭسىز ۋچاسكەلەردى انىقتاعان جاعدايدا قالا تۇرعىندارى مەن قوناقتارىنا جوعارىدا كورسەتىلگەن تەلەفون نومىرىنە حابارلاسۋىن سۇرايمىز», – دەدى استانا قالاسى ءىىد جەرگىلىكتى پوليتسيا قىزمەتى باسشىسىنىڭ ورىنباسارى گوسمان جاكين.

جەرگىلىكتى پوليتسيا قىزمەتى بۇزۋشىلىقتاردى انىقتاۋ ماقساتىندا ءجيى رەيد ۇيىمداستىرىپ تۇرادى. بۇزۋشىلىقتار, اتاپ ايتقاندا, زاڭسىز ساۋدا-ساتتىق «نۇرلى جول» جاسىل جەلەكجولى, بايتەرەك مونۋمەنتىنىڭ الدى, ەسىل وزەنىنىڭ جاعالاۋى, رەسپۋبليكا داڭعىلدارى بويىنشا ءجيى كەزدەسەدى.