اقتاۋدا حالىقارالىق كولىكتىك-لوگيستيكالىق فورۋم ءوتتى

فورۋمنىڭ باستى ماقساتى – تەڭىز پورتى جۇك اينالىمىن ارتتىرۋ, ماڭعىستاۋ وبلىسىنىڭ ينۆەستيتسيالىق تارتىمدىلىعىن كورسەتۋ. ماڭعىستاۋداعى كوزدەلگەن لوگيستيكا سالاسىندا جوبالاردى ىسكە اسىرۋ قازاقستاننىڭ كاسپيدەگى لوگيستيكالىق تورابىنىڭ قۋاتىن 2018 جىلدىڭ اياعىنا دەيىن 25 ميلليون تونناعا جەتكىزۋگە مۇمكىندىك بەرەدى.

ءىس-شارا كەزىندە كولىكتىك-لوگيستيكالىق الەۋەتتى ارتتىرۋ, كاسپي ترانزيتتىك دالىزىندەگى بىرىڭعاي تاريف جانە ءوزارا ءتيىمدى ىنتىماقتاستىق جايى ءسوز بولدى. ماسەلەنى تالقىلاۋعا حالىقارالىق تەڭىز جوبالارىنىڭ ءىرى ينۆەستورلارى – تەڭىز لوگيستيكاسى بەلسەندى دامىعان ەلدەر: رەسەي, ءازىربايجان, تۇركيا, قىتاي, گرۋزيا, امەريكا, ۇلىبريتانيا, يتاليا پورتتارىنىڭ وكىلدەرى, سونداي-اق, مەملەكەتتىك ورگانداردىڭ, جەرگىلىكتى ءىرى مۇناي كومپانياسىنىڭ جەتەكشىلەرى قاتىستى.

– ماڭعىستاۋ وبلىسىنىڭ ينۆەستيتسيالىق جانە كولىكتىك-لوگيستيكالىق الەۋەتىن ودان ءارى دامىتۋعا ارنالعان حالىقارالىق فورۋمعا قوش كەلدىڭىزدەر! وزدەرىڭىزگە بەلگىلى, ءبىزدىڭ وبلىسىمىز كاسپي جاعالاۋىنداعى بىردەن ءبىر ايماق رەتىندە ۇلى جىبەك جولىن قايتا جاڭعىرتۋ باعدارلاماسىندا شەشۋشى ماڭىزعا يە. مۇنىڭ دالەلىن وزدەرىڭىز قازاقستاننىڭ تەڭىز قاقپاسى – اقتاۋ, قۇرىق پورتتارىندا بولعاندا كوردىڭىزدەر, – دەدى جيىندا ايماق باسشىسى ەرالى لۇقپانۇلى.

كاسپي جاعالاۋى ەلدەرىمەن ودان ءارى بەلسەندى ىنتىماقتاسۋعا ماڭعىستاۋدا بارلىق جاعداي جاسالعان. ايتالىق, ەلىمىزدىڭ ترانزيتتىك الەۋەتىن دامىتۋ ءۇشىن بيىل قۇرىق پورتى قۇرىلىسىنىڭ ەكىنشى كەزەڭى-اۆتوموبيل وتكەلىن سالۋ باستالدى. جوبا بالامالى مارشرۋتتار بويىنشا اۆتوموبيل تاسىمالىن دامىتۋدا باسكەلەستىك احۋال قالىپتاستىرادى.

مۋلتيمودالدى لوگيستيكالىق تىزبەكتى دامىتۋ ماقساتىندا زامان تالابىنا ساي قۇرعاق جۇك جانە پاروم فلوتى جاساقتالۋدا. 2020 جىلعا دەيىن فلوتتاعى كەمەلەر سانى 20-عا جەتەدى.

فورۋم اياسىندا ماڭعىستاۋ وبلىسى اكىمدىگىمەن جانە «ا+ا Group of Companies», «EnerMech» كومپانيالارى اراسىندا ۇشجاقتى مەموراندۋمعا, اقتاۋ جانە اناكليا پورتتارى اراسىندا ەكىجاقتى مەموراندۋمعا قول قويىلدى. مەموراندۋمدار ەنەرگەتيكا, كولىك جانە لوگيستيكا سالالارىنا ينۆەستيتسيا تارتۋ جانە ءوزارا ىنتىماقتاستىق ماقساتىندا جاساقتالدى.

گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى