ءبىرجان اقىن ەسەپ بەردى

وبلىس ورتالىعىنداعى «تۇركىستان» سارايىندا ايتىسكەر اقىن ءبىرجان بايتۋوۆتىڭ شىعارماشىلىق كەشى ءوتتى. شاياننىڭ شىناشاقتاي شايىر ۇلى «بىزدەن دە وتەر جيىرما بەس…» اتتى جىر جيناعىن شىعارىپ، ەل الدىندا ەسەپ بەردى.
كەش شىمىلدىعى ايتىستىڭ اقتاڭگەرلەرى بالعىنبەك يماشەۆ پەن ايبەك قاليەۆتىڭ ارناۋىمەن اشىلدى. وسىدان ون جىل بۇرىن قارا دومبىراسىن قۇشاقتاپ الامان ايتىسقا كەلگەن قارشاداي بالا قازىر ەلگە ەتەنە تانىس. ايتىس پەن جازبا ولەڭدى قاتار الىپ كەلە جاتقان ول «ءبىزدىڭ اۋىل» ، «ءبىزدىڭ جىگىتتەر» سياقتى جاڭا ولەڭدەرىن وقىپ بەردى. ال، گۇلنار سيقىمبايەۆا، جارىلقاسىن داۋلەتوۆ، زاتتىبەك كوپبوسىن ۇلى، ناركەنجە سەركەبايەۆا، باعلان ءابدىرايىموۆ، ايدار تۇرعانبەك، اسقار جۇنىسبەكوۆ سىندى ەسترادا انشىلەرى اقىننىڭ سوزىنە جازىلعان اۋەزدى اندەردى ناقىشىنا كەلتىرە ورىندادى. وبلىستىق ج. شانين اتىنداعى تەاتر ارتىستەرى اقىننىڭ ولەڭدەرىنەن ۇزىندىلەر وقىدى.
وبلىستىق مادەنيەت باسقارماسىنىڭ باسشىسى ن. احمەتجانوۆ ايتىسكەر ازاماتتىڭ تۋعان ەل، تۋعان جەر الدىندا ەسەپ بەرگەنىنە ريزاشىلىعىن ءبىلدىرىپ، وبلىس اكىمى جانسەيىت تۇيمەبايەۆتىڭ العىس حاتى مەن ىزگى ىلتيپاتىن جەتكىزدى. كەشكە كەلگەن ساتيريك، جازۋشى، حالىقارالىق «الاش» ادەبي سىيلىعىنىڭ يەگەرى كوپەن امىربەك اعامىز: «ۇمىتپاسام، وسىدان ون جىلداي بۇرىن شىمكەنتتە كەرەمەت اقىندار ايتىسى ءوتتى. وعان قادىر مىرزا ءالى اعامىز ءتوراعالىق ەتتى. ول كەزدە ءبىرجان 10-سىنىپتا وقيتىن. سوندا قادىر اعام: «قازىر تاي جىگىت ەكەن، تۇبىندە وسى قازاق ايتىسىنىڭ قارا جورعاسى بولادى- اۋ» دەپ ەدى. سول جولعى ايتىستا وقۋشى ءبىرجان باس جۇلدەنى قانجىعاسىنا بايلادى» دەپ ءوز ەستەلىگىن ايتتى. «ءار ونەر ادامى ولەڭ ولكەسىنە ءارتۇرلى كەلەدى. ماسەلەن، مۇقاعالي ماقاتايەۆ ولەڭگە ءارقايسىسى ءبىر-ءبىر تاۋ، سۇمدىق اقىندار بار كەزەڭدە «ىعىسىڭدار، ەي تاۋلار، ىعىسىڭدار» دەپ كەلدى. پۋشكين «مۇندا پوەزيا تۇزى كەلە جاتىر» دەپ كەلدى. ال، ءبىرجان ايتىسقا جىبەكتەي ەسىلگەن مىنەزىمەن كەلدى» دەپ ىنىگە ىزگى باعا بەرىپ، اقجارما تىلەگىن اقتاردى.
كەش كورىگىن استانالىق سارا توقتامىسوۆا مەن بايدىبەكتىك قاجىمۇقان ابزالوۆتىڭ ءسوز قاعىسى قىزدىردى. «زامان» توبىنىڭ ورىنداۋىنداعى ءبىرجان بايتۋوۆتىڭ سوزىنە جازىلعان «قارتىم مەشىتكە كەتىپ بارادى» اتتى جاڭا ءان ادەمى كەشتىڭ نۇكتەسىن قويدى.
ماقپال تورەبەك، «وڭتۇستىك قازاقستان» .