ورىس قىزىنىڭ اشارشىلىق جايلى جازعان جىرى

1931-32- اشتىق جىلدارى قازاقستاندا ءومىر سۇرگەن 19 جاستاعى ت. گ. نيەۆادوۆسكايا اتتى ورىس قىزى دالادا قىناداي قىرىلعان قازاقتاردى كورىپ، قايعىلى جىر جازعان. بۇل جىر ەرتەرەكتە قازاق تىلىنە اۋدارىلىپ جارىق كوردى. بىرنەشە جىلدىڭ الدىندا وسى جىردىڭ ورىسشا نۇسقاسىنا قايتادان جولما-جول اۋدارما جاسالىپ، ونى اقىن ۇلاربەك نۇرعالىم قازاقشاعا تىگىسىن جاتقىزىپ ءتارجىمالاعان ەدى. مىنا فوتوداعى ايەل ت. گ. نيەۆادوۆسكايانىڭ ءوزى بولسا كەرەك…

 -بەكەن قايرات ۇلى 

اشتىق جايلى جىر
بۇل دالانىڭ قاسىرەتى جايىندا،
بىلمەك تۇگىل، ايتقان سوزگە سەنىپ كور.
كوكتەم ەمەس، سول كوكتەمنىڭ ايىندا،
كوز الدىمدا.. . مۇز قۇرسانعان ولىكتەر.

قوزعالتا الماي جاتىر انە كىرپىگىن،
ءبارى- داعى اشتان ولگەن ولاردىڭ.
بالالى ايەل نان تابا الماي ءبىر ءتىلىم،
تىرناعىنا كەتتى ءىلىنىپ اجالدىڭ.

قارا جەردىڭ قارا جەلى زار يلەر،
ولىلەردىڭ جىرتىق ءتوسىن جۇلمالاپ.
سۇلىق قالدى، شىرىلداعان سابيلەر،
سۋىپ قالعان ومىراۋدى تىرمالاپ.

بۇل نە سۇمدىق؟ كىمدەر ءبۇيتىپ قورلاعان؟
تۋعان جەرى – ءوز ەلىندە بولسا دا.
جاس وسكىندەر، تۋماي جاتىپ سورلاعان،
جازىعى نە، جازىعى نە سونشاما؟

كىم جاسادى، اشتىق دەگەن پالەنى؟
كىم جاۋاپتى؟ بىلگىم كەلەر سونى مەن.
تىرىلەردىڭ ءبارى جاۋاپ بەرمەدى،
ەندى ونى سۇرايمىن با ولىدەن؟

قۋات تا جوق، نە ايتادى ايقايلاپ،
مەس بوپ ءىسىپ كەتكەن ابدەن اش قارىن.
بىلمەيدى ولار، ماسكەۋ جاقتا توي تويلاپ،
ءماز- مەيرام بوپ استىق جيناپ جاتقانىن.

القاپتاردا قاداۋ- قاداۋ سار سابان،
مارجان بيداي جونەلتىلگەن قيىرعا.
اش- جالاڭاش سول جاندارعا شارشاعان،
ول بيدايدان جارتى ءدان جوق بۇيىرعان.

مالىن قىرىپ سالعاننان سوڭ نە قالدى؟
ول جايلى دا ەشكىم جاعىن اشپايدى.
اياز قىسسا، اش- جالاڭاش ولاردى،
ولىمگە ءوزى- اق مويىنسۇنا باستايدى.

اياق الىپ جۇرە المايسىڭ ولىكتەن،
بۇل قورلىققا شىداي الار قاي كىسى!
ءبارى جۇمباق: نەتكەن اۋىر؟ نەلىكتەن؟
وۋ، قازاقتىڭ دالاسىنىڭ قايعىسى…