تالدىقورعان – وسكەمەن، قالباتاۋ – مايقاپشاعاي جولدارى جوندەلەدى

جالپى، اۆتوجولدار رەكونسترۋكتسياسىنىڭ جۇمىستارىنا 100 مىڭنان استام ادام تارتىلاتىن بولادى.

(ينۆەستيتسيالار جانە دامۋ ءمينيسترى جەڭىس قاسىمبەكپەن سۇحباتتان ءۇزىندى)

– مينيسترلىكتىڭ جۇمىس اۋقىمى ۇلكەن. كولىك ينفراقۇرىلىمىن دامىتۋ مىندەتى دە سىزدەرگە جۇكتەلىپ وتىر. ماسەلەن، «نۇرلى جول» مەملەكەتتىك باعدارلاماسى اياسىندا ىلكىمدى ىستەر اتقارىلىپ جاتقانىن بىلەمىز. ناتيجەلى كورسەتكىشتەرىنە توقتالساڭىز.
– ءيا، كولىك ينفراقۇرىلىمىن كەڭىرەك جاڭعىرتۋ جۇمىستارى مەن كولىك دالىزدەرىن دامىتۋعا باعىتتالعان «نۇرلى جول» باعدارلاماسى جۇزەگە اسىرىلۋدا. «نۇرلى جول» باعدارلاماسىنىڭ نەگىزگى جوبالارى رەسپۋبليكالىق ماڭىزى بار اۆتوموبيل جولدارىنىڭ رەكونسترۋكتسياسىن جانە قۇرىلىسىن قامتيدى. جالپى، 2010 -جىلدان باستاپ رەسپۋبليكالىق ماڭىزى بار اۆتوموبيل جولدارىنىڭ 5 مىڭ كيلومەترىندە رەكونسترۋكتسيا جانە كۇردەلى جوندەۋ جۇرگىزىلدى. ناتيجەسىندە، ءقازىر رەسپۋبليكالىق ماڭىزى بار اۆتوموبيل جولدارىنىڭ 85 پايىزى جانە وبلىستىق، اۋداندىق ماڭىزى بار اۆتوموبيل جولدارىنىڭ 65 پايىزى  جاقسى جانە قاناعاتتانارلىق جاي- كۇيدە. ەل اۋماعىندا جالپى قولدانىستاعى اۆتوموبيل جولدارىنىڭ ۇزاقتىعى 96,5 مىڭ كم. سونىڭ ىشىندە، رەسپۋبليكالىق جەلى – 23,7 مىڭ شاقىرىم، ال جەرگىلىكتى جەلى – 72,8 مىڭ شاقىرىم. 2015-2016 -جىلدارى اۆتوجول جوبالارىن ورىنداۋعا 616 ملرد تەڭگە – ونىڭ 329 ملرد تەڭگەسى ۇلتتىق قوردان ءبولىندى. بولىنگەن قاراجات تولىق يگەرىلدى. بولىنگەن قارجىعا 9 جوبا ىسكە اسىرىلدى: باتىس ەۋروپا – باتىس قىتاي، ورتالىق – وڭتۇستىك، ورتالىق – شىعىس، بەينەۋ – اقتاۋ، الماتى – وسكەمەن، استانا – پەتروپاۆل، جەزقازعان – پەتروپاۆل، اقتوبە – اتىراۋ جانە ورال – كامەنكا. جالپى، جول- قۇرىلىس جۇمىستارىمەن قازاقستاننىڭ 12 ايماعىنداعى 2 مىڭ كم قامتىلدى. باتىس ەۋروپا – باتىس قىتاي ترانزيتتىك ءدالىزى، استانا – تەمىرتاۋ، الماتى – قاپشاعاي، قاپشاعاي – بالپىق بي، بەينەۋ – شەتپە جانە كوكشەتاۋ – پەتروپاۆل ۋچاسكەلەرى بويىنشا قوزعالىس تولىق اشىلدى. سونىمەن قاتار، پاۆلوداردا ەرتىس وزەنى ارقىلى وتەتىن ۇزاقتىعى 12 شاقىرىم بولاتىن، ورتالىق ازياداعى ەڭ ءىرى كوپىر وتكەلىنىڭ قۇرىلىسى اياقتالدى. بارلىق جوبالاردا 75 مىڭ ادام جۇمىس ىستەدى. وسى تۇستا ايتا كەتەتىن ءبىر جايت، ماتەريالداردىڭ 90 پايىزىن وتاندىق وندىرۋشىلەر دايىندادى.
– ناقتىلاساڭىز، بيىل قانداي باعىتتاردا جول قۇرىلىسى اياقتالادى؟
– 2016 -جىلى قازاقستان رەسپۋبليكاسى كولىك جۇيەسىنىڭ ينفراقۇرىلىمىن دامىتۋدىڭ جانە ىقپالداستىرۋدىڭ 2020 -جىلعا دەيىنگى مەملەكەتتىك باعدارلاماسى «نۇرلى جول» مەملەكەتتىك باعدارلاماسىمەن بىرىكتىرىلدى. ەنگىزىلگەن وزگەرىستەر بويىنشا 2017-2019 -جىلدارى باعدارلاما اياسىندا ۇزاقتىعى 4,4 مىڭ شاقىرىم، قۇنى 1,7 ترلن تەڭگەنىڭ  23 جوباسىن ىسكە اسىرۋ كوزدەلگەن. بيىلعى جىلى اۆتوجولدار رەكونسترۋكتسياسىنا 356,2 ملرد تەڭگە، ونىڭ ىشىندە ۇلتتىق قوردان 143,5 ملرد تەڭگە ءبولىندى. استانا – قاراعاندى، ورتالىق – شىعىس، بەينەۋ – اقتاۋ، ورتالىق – باتىس، قاپشاعاي – تالدىقورعان، پەتروپاۆل – رەسەي شەكاراسى جانە ورال – كامەنكا سياقتى ۇزاقتىعى 602 شاقىرىم بولاتىن 7 اۋىسپالى جوبادا جۇمىستار جالعاسىپ، بيىلعى جىلدىڭ سوڭىندا اياقتاۋ جوسپارلانعان. رەسپۋبليكالىق بيۋدجەت جانە حالىقارالىق قارجى ينستيتۋتتارىنىڭ قاراجاتتارى ەسەبىنەن جالپى ۇزاقتىعى 3,2 مىڭ شاقىرىم بولاتىن 16 جاڭا جوبانىڭ رەكونسترۋكتسياسى باستالماق. ولار: اقتوبە – ماقات، اتىراۋ – استراحان، كۇرتى – بۋرىلبايتال، بۋرىلبايتال – بالقاش، مەركە – بۋرىلبايتال، تالدىقورعان – وسكەمەن، ۇزىناعاش – وتار، جەتىباي – جاڭاوزەن، قالباتاۋ – مايقاپشاعاي، ءۇشارال – دوستىق، بەينەۋ – اقجىگىت، قوستاناي – دەنيسوۆكا، شۋچە – زەرەندى، استانانىڭ وڭتۇستىك- باتىس اينالما جولى، وسينوۆ اسۋى، تاسكەسكەن – باقتى. جالپى، اۆتوجولدار رەكونسترۋكتسياسىنىڭ جۇمىستارىنا 100 مىڭنان استام ادام تارتىلاتىن بولادى. ءبىز وسىلايشا ەلىمىزدەگى ماڭىزدى جولداردى جوندەۋمەن قاتار كوپتەگەن ازاماتتارىمىزعا جۇمىس تاۋىپ بەرىپ وتىرمىز. بۇل دا ۇلكەن كورسەتكىش دەسەم، ارتىق ايتقاندىق بولماس.

ينۆەستيتسيالار جانە دامۋ ءمينيسترى جەڭىس قاسىمبەكپەن سۇحباتتان ءۇزىندى
اڭگىمەلەسكەن
قالماحانبەت مۇقامەتقالي
« ەگەمەن قازاقستان»
سۇحباتتىڭ تولىعى

2 پىكىر

  • ماماندىگىم ميحانيك ۆاديتىل بولسادا بولادى كاتيگوريا ۆس باسكا سالاداگى جۋمىستار بولسادا بولادى

  • جول جوندەۋ,كوپىر سالۋ ەل يگىلىگىننە جارايتىن قالىق قالاۋىننان شىگاتىن جۇمىس قاشاندا جاقسى ەگەمەن ەلىمىزدىڭ الگا گارشتاپ دامۋىننا بىردەن بىر اشىق باگدار ول بولسا كەمەلدى جول
    وسى ورايدا ءوز ماماندىگىم بوينشا جۇمىس جاساپ ازدا بولسا ەڭبەك تەرىمدى توكسەم دەيىم ماماندىگىم جۇرگىزۋشى باسقادا جۇمىستارى بولسادا بولادى
    تەلەفون:87789135212