استانادا جالدامالى پاتەرلەر تۋرالى جالعان جارنامالار جويىلادى


استاناداعى تاۋلىگىنە جالعا بەرىلەتىن پاتەرلەر تۋرالى جارنامالار تولىق تەكسەرۋدەن وتكىزىلەدى. بۇل تۋرالى «استانا كونۆەنشن بيۋرو» جشس ديرەكتورىنىڭ ورىنباسارى اسقار ادامبەكوۆ مالىمدەدى.
قازاقستاندا «ەكسپو-2017» حالىقارالىق مامانداندىرىلعان كورمەسى اياسىندا booking.com جانە Airbnb سىندى اتاقتى الەمدىك جۇيەلەرمەن سينحروندالعان torlet.com ارنايى سايتى ىسكە قوسىلدى.
«پاتەردى جالعا بەرۋ تۋرالى جارناما بەرەتىن Krisha, OLX سىندى بەلگىلى سايتتاردى اشساڭىز تاۋلىگىنە 20-30 مىڭ شاماسىندا جارناما جاريالانادى. بۇل رەتتە جارنامانىڭ كوپتىگى سۇراق تۋىنداتادى. ال مالىمەت بويىنشا استانادا تاۋلىگىنە جالعا بەرىلەتىن پاتەر سانى 3000 عانا. شىن مانىندە ءبىر پاتەردى 10 ريەلتور ۇسىنۋى مۇمكىن» ، – دەپ ءتۇسىنىردى ا. ادامبەكوۆ.
سونداي- اق جارنامادا شىندىققا جاناسپايتىن سۋرەتتەر ورنالاستىرىلادى ءارى جالداۋ اقىسى دا نارىقتاعى باعادان جوعارى.
«سايىپ كەلگەندە تۇتىنۋشى ءبىرىن تاڭداپ، شىن مانىندە باسقاسىنا يە بولادى. جوعارىدا ايتىلعاندى ەسكەرە كەلە پاتەرلەرىن جالعا بەرۋشىلەر اسسوتسياتسياسى مەن ءبىزدىڭ كومپانيا بىرلەسىپ torlet.com سايتىن ىسكە قوستى» ، – دەدى ول.
جاڭا پورتالدىڭ ەرەكشەلىگى – پاتەرلەردى جاعا بەرۋ تۋرالى جالعان اقپارات جوق. وندا ورنالاستىرىلعان سۋرەتتەر دە شىندىققا جاناسادى ءارى جالداۋ اقىسى دا قولجەتىمدى. سونىمەن بىرگە جالعا الىنعان پاتەر torlet.com سايتىندا كورسەتىلمەيدى.
«ياعني سايت تەك بوس تۇرعان پاتەرلەردى عانا كورسەتەدى. تۇتىنۋشى پاتەردى ورنالاسقان اۋدانى مەن جايلىلىعىنا بايلانىستى ءوزى تاڭدايدى. تاڭداۋ جاسالعان سوڭ جالعا بەرۋشىگە مالىمەت بەرىلەدى. سوندا باسقا ريەلتورلار ءوز قىزمەتىن ۇسىنىپ ازاماتتاردى مازالامايتىن بولادى» ، – دەدى ا. ادامبەكوۆ.
پاتەردەردى جالعا بەرۋ تۋرالى بارلىق جارنامالاردىڭ راستىعى تەكسەرىلىپ، جالعان جارنامالار بۇعاتتالادى نەمەس ءبىرجولا وشىرىلەدى.
«اسسوتسياتسيا ماماندارىمەن بىرلەسىپ اتالعان سايتتا جالعان جارنامانىڭ پايدا بولماۋىن قاداعالايمىز. تاپسىرىس تۇسكەندە جارنامانىڭ راس- وتىرىگىن انىقتاپ، شىن مانىندەگى جاعدايعا كوز جەتكىزەمىز. سوندىقتان ەكسپو قوناقتارىنا جالعان اقپاراتپەن الدانىپ قالماۋى ءۇشىن وسى سايتتىڭ كومەگىنە جۇگىنۋدى ۇسىنامىز» ، – دەدى ول.