تۇراقتىلىق – تۇعىرىمىز


ەڭ اسىل قازىنالارىمىزدىڭ ءبىرى – ەل تىنىشتىعى. تاۋەلسىزدىگىمىزدىڭ شيرەك عاسىر بەدەرىندە بۇل سالادا جيناقتالعان تاجىريبە مول. سونىڭ جارقىن ءبىر ۇلگىسى قىزىلجار ءوڭىرىن مەكەندەيتىن جۇزدەن استام ەتنوس وكىلدەرىنىڭ ء«بىر ءۇيدىڭ بالاسىنداي، ءبىر قولدىڭ سالاسىنداي» تاتۋ- ءتاتتى جاراسىمدى ءومىرى دەر ەدىك. ماڭايىنا ەتنومادەني بىرلەستىكتەردى توپتاستىرىپ، جۇرتشىلىقتى بۇگىننەن دە نۇرلى كەمەل بولاشاق قۇرۋعا جۇمىلدىرىپ كەلە جاتقان دوستىق ءۇيىن تۇتاستىق پەن تۇراقتىلىقتىڭ قۇتتى شاڭىراعى، كيەلى بەسىگى دەسە دە بولادى. ءبىز تولەرانتتىلىقتى، اۋىزبىرلىكتى باعا جەتپەس باستى بايلىعىمىزعا بالاپ، وعان ءوز ۇلەستەرىن قوسىپ جۇرگەن ادامداردى سوزگە تارتقان ەدىك.
نايل ساليموۆ،
سولتۇستىك قازاقستان وبلىستىق قازاقستان حالقى اسسامبلەياسى حاتشىلىعىنىڭ مەڭگەرۋشىسى:
– ەلباسىنىڭ تىكەلەي باستاماشىلىعىمەن قۇرىلعان قازاقستان حالقى اسسامبلەياسى اياسىندا جۇمىس ىستەيتىن دوستىق ۇيلەرى تاۋەلسىزدىگىمىزگە قالتقىسىز قىزمەت ەتىپ كەلەدى. ەگەمەندىگىمىزدىڭ ەلەڭ- الاڭ شاعىنان بەرى ءتۇرلى ساياسي- مادەني شارالارعا بەلسەنە ارالاسىپ، قوعام تۇراقتىلىعىن ساقتاۋدى، تاتۋلىقتى، بىرلىكتى دارىپتەۋدى، قازاق حالقى مەن وزگە دە ەتنوستاردىڭ سالت- داستۇرلەرىن، ادەت- عۇرىپتارىن، مادەنيەتىن، ءتىلىن ناسيحاتتاۋدى باستى مۇرات تۇتادى. وسىدان جيىرما جىل بۇرىن ەتنومادەني ورتالىقتاردىڭ سانى بەسەۋ عانا بولسا، بۇگىندە دوستىق ۇيىندە – 13, اۋدانداردا 106 قۇرىلىم جۇمىس ىستەيدى.
پرەزيدەنت «بولاشاققا باعدار: رۋحاني جاڭارۋ» باعدارلامالىق ماقالاسىندا تۋعان جەردى ايرىقشا قاستەرلەۋ، وركەندەتۋگە ۇلەس قوسۋ شىنايى ءپاتريوتيزمنىڭ ماڭىزدى بولىگى ەكەنىن ەرەكشە اتاپ كورسەتتى. وسىعان وراي «تۋعان جەر» ، «قازاقستانداعى 100 جاڭا ەسىم» باعدارلامالارى ۇسىنىلىپ، تۋعان ەلگە – قازاقستانعا دەگەن پاتريوتتىق سەزىمدى قالىپتاستىرۋعا شاقىردى. بۇل تۇرعىدان ءسوز قوزعايتىن بولساق، دوستىق ۇيلەرى تاراپىنان اتقارىلىپ جاتقان شارالار قىزىقتىلىعىمەن، مازمۇندىلىعىمەن ەرەكشەلەنەدى. ولار ۇيىمداستىراتىن شارالارعا جاستار ۇلكەن ىنتا جىگەرمەن قاتىسىپ ءجۇر. مەكتەپتەر جانىنان ەتنوكلۋبتار اشىلىپ، بەلسەندى وكىلدەر تارتىلدى. كوللەدجدەر جانىنان قۇرىلعان «بەيبىتشىلىك جانە كەلىسىم» ورتالىقتارى دا ومىرشەڭدىگىن تانىتتى. ۇلكەن ەل – ۇلكەن وتباسى» ، «ۇلى دالا ەلى – تاۋەلسىزدىكتىڭ 25 نەگىزى» بۇكىلحالىقتىق اكتسيالار بارىسىندا ءۇش جۇزدەن استام يگىلىكتى شارالار اتقارىلىپ، بىرلىك پەن ىنتىماقتاستىڭ ونەگەلى ۇردىستەرى كەڭىنەن ءتۇسىندىرىلدى.
ءلاززات جالمۇقانوۆا،
№17 ۇلتتىق وركەندەۋ- مەكتەپ كەشەنىنىڭ ديرەكتورى:
– جاھاندانۋ ءۇردىسى ەرەكشە بەلەڭ الىپ، تۇسىنىكسىز قۇبىلىستار كوبەيگەن تۇستا وسكەلەڭ ۇرپاق بويىنا مەملەكەت باسشىسى بەلگىلەپ بەرگەن «ماڭگىلىك ەل» قاعيداتتارىن ۇيالاتۋ وتە ماڭىزدى. جۋىردا باسپا سوزدە جاريالانىپ، جۇرتشىلىقتىڭ ەرەكشە قىزىعۋشىلىعىن تۋدىرعان ماقالادا بۇقارالىق سانا- سەزىمنىڭ «وتباسى، وشاق قاسى» اياسىندا قالۋى سالدارىنان تۋىندايتىن كوكەيكەستى جايتتار اشىق ايتىلىپ، ءبىلىمدى، كوزى اشىق، كوكىرەگى وياۋ ۇرپاق تاربيەلەۋ جايىنا باسا نازار اۋدارىلدى. وسىدان شيرەك عاسىر بۇرىن شاڭىراق كوتەرگەن ءبىلىم ۇياسىندا توعىز ەتنوستىق ءبولىم جۇمىس ىستەپ، ەكى جۇزگە جۋىق بالا ءبىلىم الادى. ولاردىڭ اراسىندا انا ءتىلىن ەركىن مەڭگەرىپ، ءتول مادەنيەتىمەن جەتە تانىسقىسى كەلەتىندەر قاتارى كوپ. «قازاقستان – ورتاق ءۇيىمىز» ، تاعى باسقا تاقىرىپتار شەڭبەرىندە وتانشىلدىققا تاربيەلەۋ تاعىلىمدارى ۇزبەي ناسيحاتتالادى. بۇل ماسەلەلەر وقۋ باعدارلاماسىندا دا جان- جاقتى قامتىلعان.
«قايىرىمدىلىق كەرۋەنى» ، «جاقسىلىق جاسا!» ، «شىن جۇرەكتەن» اكتسيالارىنان جينالعان 4,5 ميلليون تەڭگە سىرقات بالالاردىڭ مۇقتاجىنا جۇمسالدى. دوستىق ۇيلەرىنىڭ انالار كەڭەسىمەن بىرلەسىپ وتكىزگەن شارالارى دا قولداۋعا تۇرارلىق. ماسەلەن، «اق ورامال» اكتسياسىنا 6500 ادام قاتىسىپ، 14 ەلدى مەكەن قامتىلدى.
راشبيل ەۆداەۆ،
«ەۆرەي مادەنيەتى» وبلىستىق قوعامدىق بىرلەستىگىنىڭ ءتوراعاسى
– دوستىق ۇيلەرىنىڭ ەتنوسارالىق كەلىسىمدى نىعايتۋداعى ءرولى ولشەۋسىز ەكەنىن كۇندەلىكتى جۇمىس تاجىريبەسىنەن ايقىن بايقايمىز. ولاردىڭ قابىرعالارىندا وتەتىن ءىس- شارالار ەشكىمدى دە بەي- جاي قالدىرعان ەمەس. «سالت- ءداستۇر» ەتنومادەني فەستيۆالدارى، «العىس ايتۋ» مەرەكەلەرى ادامداردىڭ ءبىر- بىرىنە دەگەن شىنايى قۇرمەت سەزىمىن وياتىپ، ودان ءارى جاقىنداستىرا ءتۇستى. «ماڭگىلىك ەل» پاتريوتتىق اكتىسىن تالقىلاۋ بارىسىندا ەل بىرلىگىن، ىنتىماعىن ساقتاۋعا قاتىستى تانىمدىق ويلار ساباقتالىپ، ەلباسىنىڭ ۇلت پەن ۇلىستاردى ورتاق ماقساتقا جەتەلەۋدەگى جانقيارلىق ەڭبەگى ەرەكشە اتاپ كورسەتىلدى.
ءبىز قايىرىمدىلىق اكتسيالارىنا دا قاتىسىپ تۇرامىز. تۇرمىسى تومەن، كوپ بالالى وتباسىلارعا، از قامتىلعان جاندارعا بىرنەشە مارتە قارجىلىق كومەك كورسەتىلدى.
وتان- قاستەرلى دە قاسيەتتى ۇعىم. مەن ازەربايجاندا تۋسام دا، سانالى عۇمىرىم قازاقستانمەن تاعدىرلاس. اعا ۇرپاقتىڭ جاقسى داسۇرلەرىن جاس بۋىن جالعاستىرسىن دەسەك، كەز كەلگەن ەلدىڭ قۋاتى – حالقىنىڭ بىرلىگىندە، تۇسىنىستىك ءتىنى – ءبىر شاڭىراق استىندا توپتاسۋىندا ەكەنىن جەتە ۇعىندىرا بىلگەن ابزال. بۇگىنگى كۇنى ەتنوستىق توزىمدىلىك، سابىرلىلىق اۋاداي قاجەت. ءوزارا سىيلاستىق پەن سەنىمگە قۇرىلعان قازاقستاننىڭ تاڭداۋى ايقىن. دوستىق ۇيلەرى بىرلىك قاعيداسىن بەرىك ۇستانىمعا اينالدىرعان. انا ءتىلدى مەڭگەرۋ، سالت- داستۇرلەردى ۇيرەنۋ، مەرەكەلىك شارالاردى ۇيىمداستىرۋ بارىسىندا ەتنومادەني بىرلەستىكتەرگە ۇنەمى قولداۋ كورسەتىپ، ۇيىتقى بولىپ كەلەدى. بۇدان بىلاي دا ەتنوسارالىق قاتىناستاردى توپتاستىرۋشىلىق ءرولى ارتپاسا، كەمىمەك ەمەس.
ءيا، ىنتىماعى جاراسقان ەلدىڭ بولاشاعى قاشاندا جارقىن. «باقىت باعالاي بىلگەننىڭ عانا باسىندا تۇرادى» دەپ تەككە ايتىلماسا كەرەك. وڭىردەگى دوستىق ۇيلەرى مەن ولاردىڭ بەلسەندى قاتىسۋشىلارى دا ەلباسىنىڭ «تۇراقتىلىق – ءبىزدىڭ تاتۋلىعىمىز بەرىك بولۋى ءۇشىن تابان تىرەيتىن تۇعىرىمىز» دەگەن سوزدەرىن باستى باعدار ەتكەن.
ءومىر ەسقالي،
«ەگەمەن قازاقستان»
سولتۇستىك قازاقستان وبلىسى