تەلەفون تەرروريسى ۇستالدى

10 -ءساۋىر كۇنى 23 ساعات 10 مينۋتتا وبلىستىق توتەنشە جاعدايلار دەپارتامەنتىنە اتىراۋ قالاسى قۇنانبايەۆ كوشەسى، 28 -ۇيدە ورنالاسقان سۋپەرماركەتكە جارىلعىش زات قويىلعانى تۋرالى تەلەفون قوڭىراۋى كەلىپ تۇسكەن.
كورسەتىلگەن مەكەنجايعا ارنايى قىزمەت وكىلدەرى جەدەل جەتىپ، سۋپەرماركەت قىزمەتكەرلەرى مەن ءۇي تۇرعىندارىن ءقاۋىپسىز جەرگە شىعاردى. الايدا، تەكسەرۋ كەزىندە ەشقانداي جارىلعىش زات تابىلمادى. حابارلامانىڭ جالعان ەكەنى انىقتالدى.
– جەدەل ىزدەستىرۋ شارالارىنىڭ ناتيجەسىندە كۇدىكتى ازامات ۇستالدى. اتالعان ءۇيدىڭ اۋلاسىندا ىشىمدىك ىشكەن ول ماس كۇيىندە قۇقىق قورعاۋ قىزمەتكەرلەرىنىڭ نازارىنا ىلىككەن. 1989 -جىلى تۋعان ازامات بۇرىن ۇرلىق جاساپ، سوتتالعان. كىناسىن مويىنداپ، تۇسىنىكتەمە بەردى. ءقازىر ق ر ق ك- ءنىڭ 273-بابى بويىنشا سوتقا دەيىنگى تەرگەۋ جۇرگىزىلىپ جاتىر، – دەيدى وبلىستىق ىشكى ىستەر دەپارتامەنتى ءباسپاسوز قىزمەتىنىڭ جەتەكشىسى گۇلنازيرا مۇحتاروۆا.
باقىتگۇل باباش،
«ەگەمەن قازاقستان»
اتىراۋ