ءجۇز جىلداي ۋاقىت بۇزىلماي ساقتالعان شاي تابىلدى


تۇركىنىڭ ءتورى، الاشتىڭ اتا جۇرتى بولعان قاتونقاراعاي اۋدانىنان تاماشا جادىگەرلەر تابىلدى جاقىندا. جەرگىلىكتى جۋرناليست جانىبەك قىزىر قاتونقاراعاي اۋىلىنداعى ەسكى عيماراتتىڭ شاتىرىنان تابىلعان كونە شايدىڭ ءبىر عاسىردان استام تاريحى بولۋى مۇمكىن ەكەندىگىن ايتادى.
«كەزىندە ورىس كوپەستەرىنەن قالعان قاراعاي ءۇي وتكەن عاسىردىڭ باسىندا نكۆد ۇيىمىنىڭ عيماراتى بولعان. بيىل شىڭعىستايداعى ابدىكەرىم مەكتەبىنە 100 جىل تولاتىندىقتان، سونىڭ بوس جاتقان ورنىنا وسى عيماراتتى اپارىپ قويۋ جونىندە شەشىم قابىلدانعان ەدى. كونە شاي وسى عيماراتتىڭ شاتىرىنان شىقتى. شاي كەسەكتەرىنىڭ ۇزىندىعى – 24, ەنى – 18,5, قالىڭدىعى – 1,4 سانتيمەتردى قۇرايدى. شاي بەتىندە «ۆ. ۆىسوتسكي» ، «چىستىي تسەيلونسكي» دەگەن جازۋلار، كومپانيانىڭ كەمە تۇرىندەگى ساۋدا بەلگىسى جانە ارابشا تاڭبا بەدەرلەنگەن. سونىمەن قاتار، شاتىردان بىرنەشە ورام بۇل تابىلدى. ءبىر تاڭعالارلىعى، بارلىعى سول قالپىندا ساقتالعان» ، دەيدى جۋرناليست.
ەسكى عيماراتتى بۇزۋ كەزىندە قۇرىلىسشىلار سونداعى ءبىر بولمەنىڭ قابىرعاسىنان «شابدان 1928» دەپ كيريلل قارپىمەن بەدەرلەنگەن جانە ارابشا جازىلعان جازبالاردى بايقاپتى.
اۋداندىق ءماسليحات حاتشىسى دۇيسەن برالينوۆ بۇل بولمەنىڭ كەزىندە قاپاس بولعانىن، ال شابداننىڭ ابدىكەرىم بولىستىڭ ۇلى ەكەندىگىن، 1928 -جىلى اكەسى ەكەۋى قىتاي اسقانعا دەيىن ول وسى جەردە ۋاقىتشا قاماقتا وتىرۋى ابدەن مۇمكىن ەكەندىگىن ايتادى.
قازىرگى ۋاقىتتا شىڭعىستاي اۋىلىندا كەزىندە ابدىكەرىم بولىس سالدىرعان مەكتەپ عيماراتى قايتا قالپىنا كەلتىرىلىپ جاتقان كورىنەدى. بۇل جەردە مۇراجاي اشىلادى دەپ جوسپارلانىپ وتىر. شاتىردان تابىلعان جادىگەرلەر وسى مۇراجايعا قويىلاتىن بولادى.
ازامات قاسىم، «ەگەمەن قازاقستان»
شىعىس قازاقستان وبلىسى