Lincoln كولىگى قىتايدا شىعارىلاتىن بولدى

Ford كومپانياسى 2019 -جىلدان باستاپ قىتايدا Lincoln ليۋكس كروسسوۆەرلەرىن شىعارا باستاماق، دەپ جازادى Fortune باسىلىمى.

كروسسوۆەردىڭ جاڭا مودەلىن Ford اۆكونتسەرنى قىتايدىڭ Changan Automobile كومپانياسىمەن بىرلەسىپ چۋنتسينداعى زاۋىتتا شىعارماق. Ford سونىمەن قاتار سولتۇستىك امەريكاداعى ءوندىرىسىن دە جالعاستىرا بەرمەك.

قىتايدا ءوندىرىس باستاۋ ارقىلى Ford كومپانياسى قىتايدىڭ 25 پايىزدىق يمپورتتىق باج سالىعىن تولەۋدەن قۇتىلىپ، وسىنىڭ ارقاسىندا Audi, Mercedes-Benz جانە BMW كولىكتەرىمەن باسەكەگە تۇسە الادى. ايتا كەتەيىك، ءقازىر اتالعان ءۇش كولىك قىتايداعى ليۋكس كولىكتەردىڭ 75 پايىزىن قۇرايدى.

2016 -جىلى قىتايدا جول تالعامايتىن كولىك تۇرلەرىنە دەگەن سۇرانىس ەرەكشە ارتىپ، قازىرگى تاڭدا بۇل كولىك تۇرلەرىنىڭ نارىقتاعى ۇلەسى 15 پايىزعا جەتتى.